威華達（622）淨現金及待售證券等，足足係現價兩倍，超級現金牛，博開鋪大嘢！威華達淨現金13億銀，連埋絕大部份反映港華燃氣（1083）嘅證券投資，高達25億銀。若果加埋嚟自大孖沙中海石油氣電待收款項5.7億銀，總數足足30.5億銀，或每股0.43元，遠遠超過現價嘅0.206元！
威華達家陣銀行連其他利息收入，3,000萬銀唔夠，而隨着證券及待收款回籠，連埋手頭淨現金，若果拎去做財仔生意，係咁意收8厘息，都年賺過兩億銀（PE等值6.2倍）。威華達大雞唔食細米，但仲揸住咁多錢，做乜？博佢有兩個可能。
變身賣殼俱值博
1）變身大升值。威華達由2007年到家陣，跌咗60%過外，連大股東歐亞平家底都縮水，應佔市值得番5.4億銀。務求市值壯大，就要搵嘢搞，威華達銀彈多，就係優勢。
事實上，啱啱今年5月，威華達就提過搞頁岩氣。雖則，喺今年8月出嘅半年業績報告中，再無提番呢壇製作，但成組思路係，集團一方面積極發憤，同時係睇定嚟食，一係唔出手，一出就要一擊即中，以博取沉寂幾年嚟嘅最大升值！
2）派高息，再賣殼。計吓數，若果威華達派晒手頭上嘅淨現金13億銀出街，市值將會大幅縮減到得番1.8億銀。而呢期殼風盛，經典股萬達商業（169），變身內房殼，股價八個月內爆升超過10倍，家陣市值成過百億銀，大、小原始股東開心到震。所以話，完全唔可以抹殺呢個可能。
呢鋪煲威華達，以集團5月話搞頁岩氣，股價隨即升1倍做參考，首站目標同樣升1倍到0.4元，次站博佢放紙鳶，目標價NAV 0.55元樓上。
錢雋
細價股專家
本欄逢周二、五刊出
足本收睇《亂噏24》x楊千嬅；緊接落嚟 Miriam繼續同你談談情,吹吹水！
周一至周五《亂噏24》約定你： http://bit.ly/appletalk24