利嘉閣前老闆羅林渭有份持有嘅黃大仙翠竹花園翠竹商場，上個月初曾經向城規會申請將商場大部份樓面改裝做酒店用途，估計可提供約52間房，仲諗住改名做獅子山酒店，賺吓自由行錢。不過，翠竹花園居民至上月中先知道，批評商場大業主冇諮詢過佢哋，群起反對。居民話，嗰度成個屋苑都冇街市，平日買嘢靠晒個商場，如果改咗做酒店，日後3,500伙人都唔知去邊度食飯買嘢。
居民當時即刻召開大會，好多人都話怕民居會變成金舖、藥房，仲擔心塞車情況會惡化，向城規會提出反對。至上月底，居民突然收到城規會通知，話商場大業主竟然主動撤銷咗酒店申請。不過，居民最擔心今次只係緩兵之計，大業主遲吓會靜雞雞捲土重來，所以都成立咗個翠竹花園關注民生委員會，監察住大業主嘅一舉一動。
足本收睇《亂噏24》x楊千嬅；緊接落嚟 Miriam繼續同你談談情,吹吹水！
周一至周五《亂噏24》約定你： http://bit.ly/appletalk24