陳冠希（Edison）因為08年女星淫照事件，曾宣佈無限期退出娛樂圈，不過有傳嗰陣佢令到老闆林建岳要攞錢出嚟賠畀廣告商，近年Edison除咗做潮服生意，仲要走埋大陸夜場同做演唱會搵錢還債，不過電影就一路都冇擔正過。
直至今年，騰訊搵咗彭發拍微電影《探靈檔案》，大膽起用陳冠希做男主角，正正幫佢重返電影圈「試水溫」，呢套微電影下月初將會有得睇。
雖然話試水溫，但有傳Edison片酬高達250萬人民幣！Edison今次演性格怪異嘅偵探查靈異案件，每集約20分鐘，第一集有商天娥做女主角，而黃德斌、滕麗名都有份演出。可能Edison都知今後食粥食飯睇呢鋪，聽聞佢好認真咁做呢套電影。
娥姐：講嘢似唱歌
同Edison喺廣州拍完第一集嘅商天娥都讚佢工作態度認真，娥姐日前仲喺電話度話：「大家喺現場臨時改對白，佢會即刻叫助手幫佢拼音，態度認真，今次我哋全部講普通話對白，我覺得佢講普通話對白好似唱歌咁。」
撰文：馮仁昭
足本收睇《亂噏24》x 楊千嬅；緊接落嚟 Miriam 繼續同你談談情, 吹吹水！
周一至周五《亂噏24》約定你： http://bit.ly/appletalk24