三中全會今日閉幕，市場憧憬有好消息出籠，港股終止五連跌，兼重上23000關，中資股明顯跑贏大市，但大市始終未擺脫上落市格局，繼續採取小注怡情策略準沒錯。
今日推介績優股海螺水泥（914），截至今年9月底止，集團首三季錄得盈利53.8億銀，按年增長36.8%，如拆開季度看，三季度盈利分別為9.7億、20.9億及23.2億銀，按季度計盈利持續增長，絕對係好兆頭；加上年尾屬水泥旺季，在價量齊升憧憬下，第四季業績值得睇高一線。
事實上，最新的資料顯示，海螺主打嘅華東市場，水泥價格按周勁升3%至7%，相信在需求進一步增加情況下，價格升勢有餘未盡。
睇估值，海螺預期市盈率13倍，普遍較同業為高，但由於屬行業龍頭，享有較高估值不無道理；與過去三年平均市盈率14.7倍比較，則有逾一成折讓。
睇圖表，海螺8月起至今，一直喺25至28元區間上落，噚日突抽升近4%，收報26.95元，成交量更較上日大增近倍，認真吸引。但由於28元水平的阻力極大，穩陣計宜候升穿該水平才追入，量度升幅可見31元，潛在升幅逾一成，否則應繼續採用炒上落嘅策略。
唐牛
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange