「巴塞隆拿贏波」！呢個已經唔係咩新聞，因為佢哋歐聯同西甲都贏到慣；不過前鋒美斯周日喺西甲出戰貝迪斯又傷出，今季已經3度因傷退下火線；球王變玻璃人，又要養傷6至8星期，巴塞球迷梗係唔希望佢傷到慣。
巴塞照炒貝迪斯4:1
美斯曾幾何時都算係鐵人前鋒，11/12、12/13兩個球季，連埋大大小小聯賽盃賽同國家隊，一季踢成70幾場都面不改容；但26歲嘅美斯踏入2013年，就似乎受病魔困擾，已經9次因傷提早退下火線。巴塞周日作客貝迪斯，美斯只係踢咗21分鐘，係中圈附近發力一跑，就發覺左邊大腿又有事，向教練席要求換人，教練馬天奴梗係唔敢博，就安排恩尼斯達入替佢，等呢位巴塞絕對重心好好休息。今次已經係美斯今季第3次因傷退下火線（見附表），而且更整傷左大腿肌，真係一傷再傷。
巴塞雖然有美斯退場，不過要取得今季第12場聯賽勝仗都冇咩難度；尼馬喺36分鐘先開紀錄，1分鐘後柏度洛迪古斯拋離比分，加上法比加斯下半場梅開二度，以4:1大勝，繼續喺西甲領放。巴塞周一就安排美斯接受軍醫嘅詳細檢查，發現肌肉出現撕裂，情況仲算嚴重，估計要休息6至8星期，佢先留喺巴塞接受治療，之後返布宜諾斯艾利斯休養；馬天奴就話：「我哋係一支強隊，擁有好多優秀球員，就算冇美斯都要踢得好，我哋唔可以用冇美斯嚟作為失分嘅藉口。」隊長佩奧爾養傷幾個月到最近先復出，佢都語重心長咁講：「美斯要更加冷靜，唔好急於復出。」
馬體會慘被逼和
其實巴塞都有條件等美斯養傷，事關同日西甲，次席嘅馬德里體育會，作客俾升班馬維拉利爾逼和1:1，痛失兩分之下，巴塞榜首優勢增至3分，歐聯H組亦已提早出線，為咗球隊長遠利益，都係等美斯百分百好番晒先上陣。
足本收睇《亂噏24》x 楊千嬅；緊接落嚟 Miriam 繼續同你談談情, 吹吹水！
周一至周五《亂噏24》約定你： http://bit.ly/appletalk24