冇辦法㗎嘞，狼振英死都唔肯發牌畀港視，咁香港人咪惟有繼續焗住睇無綫嗰啲是是旦旦嘅「各行各業明戀暗𠝹多角畸戀」式反智劇集囉。最近登場嗰套《On Call 36小時II》，好多網民都頂唔順情節相當唔專業，違反醫學常識，網上甚至有群組集合專業醫護人員嘅力量，踢爆劇中嘅戇居劇情。
究竟《On Call II》有幾「戇」？就好似主角馬國明咁，網民唔明點解呢位醫生明明喺隔離房外，都要着晒成套保護衣咁誇張，皆因女角楊怡身處嗰間房，先係隔離區喎。有網民就反諷話，要預防流感，原來只需要着膠衫，唔使戴口罩㗎！另一個錯誤位，又喺馬明身上出現，呢位醫生話喺X光片中睇到病人軟骨，但查實係照唔到㗎。
醫護人員平時忙到氣咳，但套套無綫劇都拍到各行各業主角好似好得閒咁。《On Call II》其中一幕，就講到有病人唔見咗，竟然有兩個實習醫生同一個專科醫生，得閒到喺醫院四圍搵。有醫護就不滿話：「點解電視台會覺得我哋咁得閒呢？」建立呢個群組嘅網民話，「如果真係想拍好醫護劇，唔該可唔可以認真啲，做好研究先去拍？」雖然咁多人不滿，但八方認為TVB應該唔使擔心咁多，事關啲人都係會一路鬧，一路睇。
李八方
mailto:[email protected]
【《On Call》戇位逐格睇】
馬國明飾演嘅張一健醫生，竟然喺隔離房外着晒保護衣但唔戴口罩，而企佢後面嘅人又唔着喎。
又係馬國明呀，今次仲話X光照到軟骨㖭，其實係照唔到㗎。無綫電視畫面
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange