【人物專訪】
「以小博大、避重就輕、以柔制剛」，國藝娛樂（8228）主席冼國林年前著《詠春》一書時，將這幾個口訣放封面，套用在他經營業務的手法上，原來也相當切合。「如果好似萬達咁500億，我哋無可能，就算人哋畀5,000畝地你都無用，我哋資金唔夠人多，但優點係夠靈活，總之集中攻擊……」。
記者：何凱兒
內地首富王健林旗下房產巨企萬達，早前斥500億元在青島建影城，冼國林一手策劃、投資14億元的西樵山國藝影城，自是被「牛脾」比下去的「蚊脾」。「大陸掛緊名嘅影城有五十幾個，多數係國企揸住，橫店最成功，就係民企揸嘅，國企經營嘅，要改任何嘢都要申請，好多程序，但真正嘅影城，應該係要多元化嘅……」
明年影城進入收成期
內地的做法，往往為單一個主題搭建一個影城，「前幾年一窩蜂起『太平天國』，『包青天』都有，拍完之後就無用，但我哋就唔同，明清宮、一幅清明上河圖就可以拍上下六百幾年，咁香港二十至六十年代冇乜變化，香港街可以拍晒幾個年代，小九龍城寨唔拍城寨，可以拍貧民區。」
他的影城，一直瞄準「年代劇」而建，內地有六十多個電視台去年拍了逾二萬個小時的電視劇，當中「年代劇」佔80%。
冼國林說，西樵山影城上年未正式開張，單是TVB就有三套劇在此取景；明年，影城踏進第一期收成期「九成嘅景都完成咗，𠵱家每次限一至兩組，最高可以容納20組，一日嘅收費由6,000至7,000蚊人民幣，到3至4萬蚊都有，好似個特色火車站收4.8萬蚊人民幣一日，𠵱家拉勻每日有廿萬蚊左右收入，咁劇組唔止租場，仲要用其他配套，一個劇組一個月會用不少於100萬蚊使費喺我哋影城……」
夥中型發展商搞戲院
他強調數字並非胡作，因為他自己也懂拍戲，一個劇組每日最少使費五十萬元，而影城內那幢由他親自設計的酒店，將肩負「賺盡」劇組使費的重任。
撇開影城不說，冼國林還在影院的範疇「以小博大」。去年底，國藝夥拍澳娛組合營，在珠海開展戲院生意。「全國最缺係戲院……搞戲院有兩個困難，搵個好地方、好商場，我集中同中型發展商合作。」近期創業板出現賣殼潮，問及市值5億元的國藝會否考慮，「我梗係唔會賣喇，裡面咁多嘢，拆酒店出嚟上市反而有得諗……」冼國林如是說。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange