肥媽瑪利亞早前發現生子宮瘤，今日會入院準備聽日做手術。噚日車淑梅《舊日的足跡》播出肥媽錄音訪問，肥媽話見到屋企人同朋友都好擔心佢，自己個心都唔舒服，佢話：「我老公成日唔剃鬚、着住拖鞋周圍行，我諗男人比較擔憂啲。」
肥媽話樣樣事都唔放心，包括88歲嘅奶奶，老公性格又驚青，仲有一班兒孫，講講吓肥媽仲忍唔住偷泣：「我將自己交畀神，我唔係想喊，咁多人錫你應該開心，但總會有啲擔心，唔好令錫我嘅人擔心就夠。」肥媽話今次入院起碼五至七日，之後留家休息。
三人同台必出事
肥媽上月接受訪問時仲話唔敢再同陳潔靈、葉麗儀開騷，因為每次都有事發生，佢話：「第一次我老公吞咗螺絲，之後葉麗儀先生腰骨做咗幾次手術，第三次就陳潔靈老公唔喺度㖭，第四次又到我有事，話我迷信又好，每次三個演出就有事發生，同埋𠵱家我個病發作，都唔知可以唱幾耐，冇理由拖住兩姊妹，個瘤由8月到𠵱家，大咗四、五倍。」
撰文：馮仁昭
足本收睇《亂噏24》x楊千嬅；緊接落嚟 Miriam繼續同你談談情,吹吹水！
周一至周五《亂噏24》約定你： http://bit.ly/appletalk24