「中國首富」王健林旗下萬達集團上周喺紐約佳士得以1.72億元（人仔．下同）投得畢加索名作《兩個小孩》，被人話燒錢之餘，有專家幫佢計數，計埋關稅、增值稅，佢如果運呢幅畫回國要交稅4,000萬元。不過，王健林每次出手投資都幾十億、幾百億，幾千萬算係乜!
今年《福布斯》中國富豪榜，王健林以860億元身家成為首富，佢出名使得豪，舊年花約200億港銀買入美國第二大院線AMC，今年又斥資300億喺青島建東方影都電影城，呢個項目9月舉行奠基儀式時，仲請到里安納度狄卡比奧、妮歌潔曼、梁朝偉等中外明星到場，相當誇張。
「已經買平咗」
萬達上周以1.72億元買入畢加索一幅畫，就被人話土豪，萬達藝術品收藏負責人郭慶祥就認為，大家應該引以自豪，唔應該將焦點放喺花幾多錢上面，家陣市道低迷，佢哋買平咗㗎喇，換轉5、6年前，可能要過億美金先買到咁話。
專家未得閒自豪，反而急不及待幫萬達計數，事關如果將《兩個小孩》運返中國，萬達可能要交4,000萬元稅，包括關稅6%同增值稅17%。
上海收藏家劉益謙9月喺紐約蘇富比以5,036萬元，投得蘇軾《功甫帖》，就係因為稅收太重皮，關稅都要301萬元，惟有將藝術品運到香港，再以「借展」方式畀返自己嘅美術館。
講起富豪豪買藝術品，香港代表一定係華置（127）主席劉鑾雄，大劉2006年曾以1.35億港元買入安迪華荷嘅毛澤東畫像，成為一時熱話。
李華華
mailto:[email protected]
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange