廣州恒大披荊斬棘，前日終於喺主場捧起亞冠盃，一眾恒大球員嘅家人都總動員到場做應援團。而場外焦點就落在美艷嘅恒大太太團，靚太們個個悉心打扮，以歐美look現身觀眾席，搶眼度絕對唔輸畀英超WAGs。國腳孫祥、張琳芃兩位嬌妻更畫上近年復古look大hit嘅紅唇，潮得嚟又好意頭，太太團助威都要落足心機。
不過講到恒大太太團，相信球迷對郜林太太王晨（左）最有印象。似足㗎妹嘅王晨絕少濃妝艷抹，經常以簡樸打扮示人，可能因為仲係90後，大把本錢走清新路線，更不時嘟嘴賣「萌」。不過比起其他太太們嘅「膠」樣，王晨baby fat的確都擊倒隔籬啲V剎面。雖然郜林同王晨今年9月先結婚，但對恒大球迷嚟講一早係老面孔，皆因王晨讀大學嘅時候已經成日去球場為男友打氣，主修演藝嘅王晨，畢業後揀咗去深圳電視台體育台做記者，有時候仲可以寓工作於拍拖，賽後直擊男友做訪問，所以有啲球迷都稱佢哋為「聖卡斯夫婦」，可見王晨有幾得球迷歡心。雖然鄰家女孩王晨冇咩「電力」，但人始終都係鍾意啲冇咩殺傷力嘅面孔。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange