安踏體育（2020）上月底公佈，明年第二季訂貨會表現維持強勢，按年再次錄得高單位數增長，集團表示，訂貨會結果可確認業務或已出低潮。另一方面，以分銷商及加盟商營運數字計算，第三季品牌產品同店銷售增長維持平穩。
睇番安踏截至6月底止中期數據，同舊年下半年比較，雖然營業額再跌近一成，但其餘指標如毛利、純利及毛利率均見反彈，相信與分銷商完成積壓存貨不無關係，嚟緊全年業績將更有睇頭。除傳統零售店外，安踏於2010年初，已經喺淘寶網推出首間網上旗艦商城，另於亞馬遜、京東、凡客及愛購網等電子商貿平台搶灘。
今日正正係網購一年一度嘅大日子——光棍節，市場估計淘寶網今年單日銷售額有望達350億人仔，安踏早着先鞭發展網購，肯定可以分一杯羹。
早前花旗發表報告，指安踏訂貨會表現符合該行預期上限，並估計有機會派特別股息，安踏現價息率已接近四厘，倘增加派息，吸引力將進一步提高。
安踏上周五收報11.50元，跌1.7%，周線呈大圓底走勢，首站上望13元水平，倘成功突破，中線可以2011年高位15元作目標，潛在升幅達三成。
唐牛
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange