皇家馬德里叫得做銀河艦隊，就梗係講星味，一招「雙億齊飛」已經吸引全球無數粉絲，上周六西甲聯賽，其中「一億」基斯坦奴朗拿度（C朗）連中三元，助球隊以5:1大炒皇家蘇斯達，另「一億」加里夫巴利都有貢獻助攻，而且行緊嘅路copy番好似C朗咁，連髮型師都搵埋C朗嗰個。
巴利今季以1億歐元轉會費由熱刺轉投皇馬，就成日俾人話佢抄C朗，好似座駕方面，兩人都擁有郭富城喺澳門落場鬥嘅Audi R8超跑，衣着方面巴利以前都算平民化，不過近得C朗多就越嚟越浮誇，一身名牌唔在講，連品味都同C朗咁強國化。由曼聯轉投皇馬都差不多1億歐元轉會費，C朗除咗扭波叻，另一招牌就係佢個髮型，之前教過C朗嘅教頭費格遜同摩連奴，都寸過C朗淨係識喺半場休息時gel頭，佢又真係gel頭高手，無論大雨定打風，踢完90分鐘比賽佢個髮型都係迄立不倒。
用同一位猛料髮型師
C朗個髮型咁靚仔，巴利又點會唔跟足？巴利嚟到馬德里，一於搵番C朗御用髮型師施亞路（Jose Siero）整頭髮；Jose都好猛料，搵佢嘅明星、運動員都好多，好似比比、法比奧干查奧等皇馬球星，甚至之前嘅希古恩都搵佢剪髮，Jose第一次見巴利，就話巴利令佢聯想到C朗咁，所以就幫巴利整番一個C朗同樣嘅9、1分界蛋撻頭，巴利當堂十分滿意啦。
助攻王幫皇馬剃「蘇」
咁講真，淨係髮型靚仔又幫到球隊，巴利復出後果然狀態回勇，都算不枉佢係全球最高身價球員。上周六西甲主場出擊，皇馬憑C朗連中三元，加上基迪拉同賓施馬各建一功，以5:1大炒皇蘇，巴利都交出1個助攻，來投後已累積4次助攻，同賓施馬平起平坐，都係皇馬今季助攻王。越近金球獎投票，C朗就越勁，西甲累積入球已達16個，連埋歐聯已經連續4場有波入，不過對於今年金球獎爭逐不及拜仁慕尼黑中場列貝利，C朗就淡淡然回應：「金球獎得獎與否唔係我可以決定，我唔會擔心，𠵱家我只想幫皇馬贏波同拎冠軍。」
足本收睇《亂噏24》x楊千嬅；緊接落嚟 Miriam繼續同你談談情,吹吹水！
周一至周五《亂噏24》約定你： http://bit.ly/appletalk24