俊知（1300）疑似被大戶斬倉，股價一小時瀉足五成，該股上月曾向基金配股集資3.6億元，每股3.15元；以上日最低位計，接貨者輸足55%，批股後散水，動機相當明顯，實在不宜貪平撈底。
歐洲突然減息至0.25厘，創紀錄新低，反映經濟仍唔掂，要再壓低歐元，協助歐豬國家復蘇，但意味減息空間進一步下降。另一方面，每次美國經濟數據好轉，市場就憂慮退市，股市向下；相反，數據唔掂個市就升，相當反智，但股市本質就是少數（資本）服從多數（資本）的遊戲，即使邏輯如何正確，企錯少數嗰邊，注定冇運行。撈底多數輸錢，追入破頂股反而賺錢，就是這個原因。
上周推介的乾隆科技（1236），兩周內飛升一倍，但市值仍未夠10億元。聞說此股莊家極勇猛，目標要炒至10元樓上，但股市變幻莫測，呢啲所謂目標價，聽過就算。
上海復旦（8102）公佈首三季業績，按年增長44%至1.13億人仔，但相比半年1.2倍的增幅，遜色不少。單睇第三季，純利3,224.5萬人仔，較去年同期倒退21.2%，較第二季更大減47.2%，點睇條數都唔算靚。公司上月底發盈喜以來，股價約升一成，對比盤數，應是炒過龍。以全年每股盈利28.2分計，現價預測PE約24倍，不算太吸引，戰友可候7.5至7.7元附近上車，中線可挑戰10元大關。
魏力
http://www.facebook.com/2012jason
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange