周六亞冠盃決賽次回合，FC廣州（恒大）主場跟FC首爾踢成1:1，兩回合3:3，恒大靠作客入球優惠，奪得冠軍，創會以來首當「亞洲之王」。恒大封王共贏得1,800萬；總計今屆亞冠盃共得1.57億人民幣獎金。特約記者廣州直擊
今場決賽48,000張門票早已售罄，比賽當日下午，場外有人炒賣「黃牛」，售價約3,000人民幣（約3,800港元），但到開波前夕，門外已不見黃牛黨；可容納5萬人的廣州天河體育場幾乎座無虛席，只有客隊球迷區尚餘空位。大部份恒大球迷都穿上紅衫，全場歌聲與吶喊聲不絕於耳，但每當FC首爾觸球，場內噓聲四起。
恒大首回合與FC首爾踢成2:2，擁兩個作客入球在手，教練納比今場排陣較保守，收起前鋒郜林，派出趙旭日上陣，與鄭智及黃博文打3防中，至於前線攻堅的重任就交給孔卡、艾傑臣及穆里奇3位外援。FC首爾的陣容比上場更完整，後防有車斗里停賽後復出。
靠較多作客入球封王
恒大初段較主動，圍攻FC首爾。16分鐘，張琳芃傳中，孔卡抽射擦柱出界，5分鐘後，孔卡在禁區外施射再次中柱。之後，艾傑臣禁區頂大位起左腳遠射，但被FC首爾門將金龍大撲出。恒大及後放慢節奏，FC首爾搶回不少控球，半場互交白卷。半場期間，球場上空出現寫上「恒大必勝」的滑翔傘。
58分鐘，恒大快速反擊，3位外援射手互相配合，最後由艾傑臣建功，但4分鐘後，首爾靠黑山國腳丹恩奴域的入波，追成1:1。之後戰情開放，雙方對攻，但未能再增添紀錄，最終1:1完場，總比數為3:3，恒大靠較多作客入球封王。自亞冠盃於改制後，恒大成為首支奪冠的中國球隊；恒大亦將出戰今年底的世冠盃，與拜仁慕尼黑及明尼路等勁旅爭奪冠軍。
亞冠總獎金1.57億人仔
恒大這一場和波奪冠，獲得900萬獎金人民幣，再加上亞洲足協給予的900萬獎金，他們單場贏得1,800萬；據《新浪》統計，總計今屆亞冠盃，他們共得1.57億人民幣獎金。恒大已包攬亞冠盃及中超兩項錦標，他們之後會出戰中國足協盃4強，力求成為3冠王。恒大中場鄭智賽後很激動，他將目光放到中國足協盃及世冠盃之上，「非常感謝！希望我們能把今天這個勢頭以及好的打法延續下去，我對未來充滿希望。」
花絮
半裸土豪
土豪女又嚟喇！話說有班嚟自大學城足球協會嘅女球迷，前日已經到場撐「土豪門」恒大。呢班靚女噚日繼續身體力行，更將「土豪」寫上身（圖），令現場氣氛急劇升溫。
殺入香港
恒大「粉絲」聲勢浩大，全國有8個官方球迷會，當中規模最大同歷史悠久嘅廣州球迷聯盟副會長Leo（左）就話，因為球隊成績好，所以越來越多人支持恒大，而本身係南華球迷嘅會員阿斌（右），就計劃下年搞個香港支部，希望幫多啲港人北上睇中超，同時吸引番多啲內地球迷嚟睇港甲。
費高觀戰
呢場亞冠盃決賽星光熠熠，最耀眼嗰粒星就莫過於係葡萄牙名宿費高（圖）；佢同前皇家馬德里隊友希亞路齊齊嚟捧場。雖然佢兩位都掛咗靴一段時間，但身形仲保持得好好。除咗足球圈嘅名宿，𠵱家教緊女排國家隊嘅郎平都有嚟睇。香港方面，港協會長霍震霆同香港足總主席梁孔德都有入場睇。
公安清場
話說前日「天體」冇掩雞籠，普通人無記者或職員證，都可以走入草地自拍。噚日當局就非常重視，開波前5個鐘已清場，唔畀球迷進入平時都可以守候等入場嘅南廣場，賽前兩個鐘仲派數以千計嘅公安在場註守（圖），高度戒備。
足本收睇《亂噏24》x 楊千嬅；緊接落嚟 Miriam 繼續同你談談情, 吹吹水！
周一至周五《亂噏24》約定你： http://bit.ly/appletalk24