【殭屍翻生之人生道理】與《殭屍》中飾演惡殭屍冬叔的吳耀漢對談是有趣的，而且像是上了一堂人生道理課，他所說的雖是由細聽到大，滿足、惜福等看似顯淺的道理，但由充滿人生歷練的他說出口，特別有感染力。於70年代開始活躍於香港影壇，是港片盛世的一員，從影多年幾乎沒得過演員獎項，但他從不介意；於前年做過「通波仔」手術的他提醒大家要活得滿足，財富夠用便好，要抽多些時間陪伴家人：「最緊要活得滿足，人滿足就自然快樂，有趣嘅係滿足係冇成本，點解唔去做呢？好似某富豪以前一個老婆𠵱家兩個妾侍，乜車都有，佢都話似俾人強姦，你話佢係咪開心？」
撰文：文國駿
人稱Uncle Richard的吳耀漢已73歲，但在他身上找不到老態，訪問當天見他一身運動裝打扮，身形保持得甚好，而他心境也像一個老頑童一樣，甚多說話，喜歡講東講西的他甫坐下便向筆者「投訴」：「你哋《蘋果》個app係多嘢睇同方便……不過成日有廣告彈出嚟阻住晒喎……」還未來得切反應，他已經轉了話題，這位uncle真難捉摸。
自70年從英國回流香港後，吳耀漢便於影壇打滾，最叫人印象深刻的當然是80年代的福星電影系列，除了是人所共知的喜劇演員外，吳耀漢於回港初期亦曾自組公司擔任電影製作人，談到當老闆的經歷時自言甚為好運，他說：「我做製作人嗰時個市道真係好好，我第一部蝕少少都冇驚過，第二部平手，第三部就開始賺啦。不過做老闆同演員之間揀，我都係鍾意做演員多啲，煩少好多嘛！」吳耀漢的演員生涯中大部份時間也是飾演喜劇配角，到近二十年更只是以客串為主，他說：「主角定配角真係冇乜所謂，只係我有個嗜好就係鍾意同未合作過嘅導演合作，尤其係新導演，因為佢哋執導方法係最難捉摸，有啲似高手過招，睇吓佢畀乜指示我，我又可以畀番啲乜嘢佢，所以今次接拍咗Juno（麥浚龍）嘅《殭屍》，同呢個年輕人合作都好開心。」
「滿足冇成本」
截至前日，《殭屍》票房已收1,251萬元，叫好叫座，片中鮑起靜對吳耀漢的執念令他成為殭屍，問吳耀漢如何看「執念」？本來全程也甚為輕鬆的他一臉認真說：「太執着可能會仲難受，好似早前我外母喺英國病重，唔捱得幾耐，我老婆掙扎究竟過唔過去見佢老人家最後一面，最後我叫佢諗清楚，因為我外母已經冇意識，我怕老婆見到佢病重個樣會頂唔順。到最後信仰幫咗佢釋懷，佢會覺得佢媽咪走係回歸天國。」吳耀漢自言是一個很看得開的人，尤其是前年做完「通波仔」手術之後，他說：「一次大病後會發覺冇嘢重要得過健康同快樂，要健康係因為我想照顧我身邊人，我唔算係好有錢，但足夠生活已經好好，所以我喺演員生涯後期都係為興趣而拍嘅，至於快樂好多時係嚟自滿足，滿足又冇成本嘅，點解唔去做？」
談到同為圈中人的兒子吳嘉龍，入行多年也未有代表作，吳耀漢坦言從未叫過兒子放棄，他說：「我個仔成日都話最proud of係我畀佢足夠嘅空間，我覺得佢開心同埋知自己行緊條乜嘢路就得，最緊要係享受人生。」
足本收睇《亂噏24》x楊千嬅；緊接落嚟 Miriam繼續同你談談情,吹吹水！
周一至周五《亂噏24》約定你： http://bit.ly/appletalk24