近日美式足球聯賽NFL爆出欺凌事件，令到NBA賽會上周五出通告，提醒球員同樣嘅情況喺聯盟內絕不容許。點知日前輸畀湖人嘅火箭，就出現全隊賽後喺球員通道狂插林書豪（林瘋）嘅場面！林瘋日前練完波話只係溝通上嘅誤會。
俾隊友圍插
火箭日前主場以98:99輸畀湖人，去到第4節最後階段一次攻勢，林瘋諗住組織攻勢，超人同柏臣斯都有配合，但係夏登就企埋一邊又唔走位，完全唔參與，搞到林瘋交唔到個波，最後自己射失；湖人反擊得分，火箭叫暫停之後，夏登走埋去係咁話林瘋，美國籃球網《Hoopsworld》一位球評家，仲喺twitter話要比華利同教練麥希出手勸阻，夏登先收斂。點知完場之後，據傳一班球員同助教都發咗癲咁猛鬧林書豪，由球員通道鬧到更衣室，情緒已經完全失控！
事件被網民瘋傳，唔少球迷都話夏登唔成熟，令到林瘋成為代罪羔羊；仲有網民話火箭兩大球星懷特侯活同夏登，心智唔成熟，成班波一盆散沙咁，今季想有好成績都難。亦有網民講番之前快艇大炒火箭一戰，都有同樣情況，就連同林瘋稱兄道弟嘅前鋒柏臣斯，都插埋林瘋一份！
上周五林瘋操練之後回應被隊友「欺凌」事件：「我哋睇番錄像，理解番之前做錯啲咩。之前大家溝通上有啲問題，今日成班人討論咗好耐，應該冇問題。」就算火箭球員唔係欺凌林瘋，但係圍插事件睇嚟係真嘅，如果情況冇改善，佢可能季中被交易走都唔出奇。
足本收睇《亂噏24》x 楊千嬅；緊接落嚟 Miriam 繼續同你談談情, 吹吹水！
周一至周五《亂噏24》約定你： http://bit.ly/appletalk24