「我唔想大紅大紫，唔想做天王。」這是入行7年的陳柏宇心底話，因為他是一個鍾意hea的人，雖然熬了7年才等到本月底開處男騷，但愛輕鬆的他卻要開騷前幾日都放假；雖然拍了兩部港視劇推出無期，但他卻不覺得遺憾，首次拍劇的他更曾跟導演頂頸，果然我行我素。
撰文：余燕儀
現年30歲的陳柏宇因動L「名噪一時」，跟他的歌曲《永久保存》、《你瞞我瞞》一樣出名，入行7年的他將於本月底在九展舉行處男騷，他說：「雖然未做過演唱會，但我未緊張喎，想開騷前幾日放假休息吓，我想hea啲。」
怕太紅唔想囂
第一次開騷，陳柏宇希望對觀眾有交代，透過演出表露自己的性格，他說：「我係好放鬆好hea好隨意，鍾意正面諗嘢嘅人，歌曲可以睇到我呢7年嘅變化。」80後的他自言是一個愛hea的人，甚至是一個典型宅男，他說：「休息時鍾意留喺屋企睇電視煲劇煲DVD、打機、執嘢丟掉，女友（符曉薇）成日叫唔好丟嘢，我哋唔係一齊住，但佢會過嚟煮飯。」
愛hea的性格，是否不適合在娛樂圈生存？陳柏宇卻悠然自得說：「咁至適合，唔大壓力先有心做，我放鬆表現更加好，非常滿意自己成績，係我應得，如果再紅啲反而唔適合，𠵱家仲有大把路行，以終身職業計，我鍾意進步感覺，睇住自己慢慢升，唔想一炮而紅，因為好難keep，我唔想自己變得囂，俾人話大支嘢，我唔係追求夢想，係搵食，始終係一份工，要食飯供樓養妻活兒。」
活得自在的陳柏宇原來不想大紅大紫，他坦白得可愛：「我唔想最紅唔想做天王，太大壓力，冇晒私人時間，之前試過一日做20粒鐘，日接夜冇得瞓，連續幾個月好辛苦，壓力爆煲，每人有自己位置，有人適合做老闆有人適合做員工，我適合做員工，世界好公平，有咁多收穫就有咁多付出，有得必有失。」
之前陳柏宇幫港視拍了兩部劇《童話戀曲201314》和《大眾情性》，因為港視攞不到免費電視牌照，《大》劇只拍了一集便停工。
抱不平鬧導演
陳柏宇說：「拍劇幾好玩，鍾意原因係長時間工作可建立關係，合作夥伴令過程有樂趣，學識同其他人相處，試過同其中一位導演有磨擦，佢鬧其他演員嘈唔專心顧住玩，但我自己睇唔係咁嘅事，例如有次佢鬧人去咗邊？人哋去廁所唔得咩？雖然佢唔係鬧我，但我覺得唔公平，同佢頂咗兩次頸，我係抱不平嘅人，雖然冇乜用，改變唔到佢諗法，但我唔理，出聲先。」
對於港視不獲政府發牌，他說：「真係可惜，佢哋投放好多時間心血，我唔係激進派，唔會遊行，我立場中立，政府透明度唔高係疑點，公佈得唔合理，因為冇解釋，但法例以一個白紙黑字形式作為遊戲規則，大家要跟遊戲規則去玩。」
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com睇番足本網上版，除咗有專訪外，仲有好多時裝靚嘢睇！