政治就如敵人，打不過他不如加入他，其實政治一啲都唔討厭，因為政治其實很足球。
香港政府很阿仙奴，死搓爛搓係本份，交來交去是應份，萬一唔小心入波實屬不幸，因為要將個波交返畀對頭人，即係還政於民。
政府高官很新特蘭，人工高級表現低級，偶然偷雞贏波攞彩，原來都只係由包尾變咗尾二；只可惜英超會炒人，政府唔會。
上街的人很利物浦，火力強勁全力搶攻，博得好多Fans歡心；但可唔可以長射長入，就要睇吓中場有冇多啲輸送，同埋睇清楚邊度係龍門。佢哋唔係要攞冠軍，但爭取前三不是夢。
唔上街的人很韋斯咸，你唔搞我我又唔搞你，不求有功但求無過，場場窿對窿都叫做有分落袋。但唔使輸即係冇得贏囉，有一日降咗班先知日子原來白白錯過。
香港睇外國波嘅球迷很曼城，有錢就有得話事，前中後三線乜嘢世界波都有得你睇；但香港睇本地波嘅球迷就很侯城，因為本地球隊通常冇乜錢，又鍾意不時改吓名，只不過最後都係冇人知道你曾經存在過，一去無痕。
香港嘅運動員很修咸頓，唔係你有些少成績嘅話眼尾都唔會望吓你；萬一有成績就話一早睇好你，到你表現稍為回落就會即刻放棄你，最慘係由始至終都唔覺得主角會係你，「虛火嚟㗎啫，遲早跌番落嚟！」這是不少人的心底話，修咸頓，頂住呀！
香港的窮人很水晶宮，就算有《窮富翁大作戰》來關心弱勢社群，主角都係嗰一位富翁；正如每周聯賽大家淨係關心水晶宮俾對手數幾多球，而冇人理會水晶宮包尾咗幾多個禮拜，睇佢唔到，下年佢都唔喺度啦。
香港的老師都很熱刺，明明最好的日子已經過去，最好的球員已經走咗，仲要係咁左堆右砌捏造一堆理由，去話畀下一代知明天會更好。其實更好的，是另一隊。
轉軚的議員都很卡迪夫城，為咗利益由藍轉紅又得，不分青紅皂白亦得，有鬍鬚嘅就係佢老細，準備一世做奴隸。
其實香港人都很曼聯，口講話要畀啲時間嘅，慢慢就會改變㗎喇，遲早會返去以前咁威嘅……其實心裏面一直掛住以前嗰位阿爺嘅笑容，亦知道呢副笑容永遠都唔會再返嚟！阿門。
KEYMAN
now TV主持
足本收睇《亂噏24》x 楊千嬅；緊接落嚟 Miriam 繼續同你談談情, 吹吹水！
周一至周五《亂噏24》約定你： http://bit.ly/appletalk24