【光宗耀祖】歌手古巨基同打過美國NBA嘅內地球星易建聯、霍啟剛睇齊，講嘅唔係身高同身家，話緊嘅係佢哋當選今年「廣府人十大傑出青年」。祖籍茂名嘅基仔被首屆「世界廣府人懇親大會」評選做傑青，下個星期二會喺廣州舉行嘅懇親大會開幕禮度頒獎。知道消息之後，基仔喺微博上寫住：「榮幸！感恩！」基仔獲獎應該同佢平日熱心公益有關。另外，評委會仲評出廣府人「十大傑出人物」，當中就有粵劇名伶、祖藉開平嘅紅線女，以佢嘅資歷自然當之無愧。
至於霍震霆都戥個仔啟剛開心，噚日佢喺電話度話：「後生應該做多啲嘢，為社會做多啲嘢。」啟剛令佢引以為傲？霍震霆就話：「年輕人應該謙虛啲！佢有獨立思考，要多貢獻社會。」
同蘇有朋撐枱腳
除咗喺微博感謝得獎，基仔仲喺微博登咗張同台灣藝人蘇有朋一齊行夜市食嘢嘅相，不過就俾網民取笑佢哋「基情四射」！佢兩個之所以咁老友，當然係因為合作拍過瓊瑤嘅愛情劇《情深深雨濛濛》。今次基仔就同蘇有朋逛夜市食麵線同豆花，仲話：「台灣之旅，百年沒重逢的老友帶我去找好吃的，這是多麼難得的敍舊！有朋，來香港我做東道！」唔怪得之佢哋俾網民取笑有景轟啦！其實佢哋合作之外，仲先後演過《還珠格格》嘅「五阿哥」，所以又有fans話佢哋今次係微服私訪喎！
場主：守庫
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！