我要梁朝偉！
電影監製施南生少時志願是當外交官，到頭來卻在娛樂圈打滾半生，經歷電視黃金時期，見證千帆並舉。對於今日香港電視節目已經提不起興趣，寧願買部機頂盒看內地節目、欣賞最新電影，都不要雞汁撈飯。
曾幾何時出產過梁朝偉、劉德華及周潤發的五台山，近年乏善足陳。施南生認為當創意工業創意不再、競爭不再，就算再過十年，都變不出另一個偉仔。
撰文：何永寧
要看梁朝偉麻煩付鈔入場，免費娛樂的電視台，近十年都打造不出有偉仔身影的演員。62歲的施南生看得透徹，早前她為監製的電影《過界》宣傳接受本報訪問，她先後在無綫、麗的（亞視前身）及已結業的佳視任職，但近年居然少看香港電視，她說：「唔好睇，或者咁講，唔啱我睇，好似旅遊節目啲主持講嘢儍更更，都唔知佢講乜嘢。」既緬懷甘國亮《執到寶》、《過埠新娘》的新意，又回味《狂潮》長篇劇集的戲味，她形容現在的監製懶理劇集缺乏魅力，只要TV dinner（速食餐）就可以，因為根本拍甚麼都沒有人會轉台：「五台山年代有競爭，個個挖空心思去拍好嘢，造就一班台前幕後人才譚家明、杜琪峯，同埋幾多𠵱家一線演員。」
偉仔曼玉 操弗外闖
施南生解構電視發展跟電影的重要性，她說：「世界各地每一個好嘅電影圈，都會有一個好嘅電視圈，電視圈係搖籃，可以提供相當多嘅人才。」她見證梁朝偉、劉德華甚至張曼玉都是在電視圈經歷了一段日子，就算自己當年都是跟麥當雄擔任製作後，再跳去影圈發展：「當佢哋喺電視拍咗幾部代表作，操fit咗咪去影圈闖囉。」她認為觀眾覺得以前的電視好看是有原因，十足十的創作又很用心拍：「𠵱家我都提唔起興趣睇電視，班同事幾百蚊幫我買咗部小米（機頂盒），已經好多嘢睇，我要睇嘅羽毛球比賽，連最新電影都睇到。」
施南生笑言不敢評論今日的電視台是否淪為抄襲的影印機，但至少看不到當中的創意，她說：「喺電視台嚟講又無可厚非，佢哋經過一段長時間運作，搵到一個模式可以持之以恒去營運，在商言商，又冇理由要佢變，因為唔使做任何嘢都夠贏，問題係政府放棄引入更多競爭。我唔識王維基，不過我支持創作。」她笑言政府不支持創意亦不是甚麼新聞，嘴裏說一套，行為最誠實：「韓國政府支持影藝發展係人都知，音樂、電視劇等等，商界就借呢班創造出嚟嘅偶像去行銷韓國嘅電子產品，變成一個相輔相成可持續發展。人哋馬來西亞都識拍戲有補貼，創意工業淨係靠民間力量唔夠，一定要有政府行為。」
施南生少時志願是當外交官，貪其可以飛來飛去周遊列國，最後入了影圈做監製，安於本份亦沒有想過轉當導演：「有一剎那諗過，不過好快打消。一個好嘅導演除咗技術掌握，同性格都有關，導演有時喺合理情況下，要唔理人哋感受，例如：『喂，你同我去球場跑，跑十個圈！』可能咁跑出嚟拍攝嘅效果好好，不過我唔得，會覺得個演員好難受，所以做唔到導演。就算做，我都只會係三流頭、二流尾導演，都係算。反而我嘅性格適合做製片，可能我鍾意同人傾偈，同人溝通。」
拉攏嘉玲 提攜後輩
施南生所以相識滿天下，來自這份凝聚力，林青霞、俞琤、已故的張國榮及黃霑等都是她的好朋友，當中俞琤更促成施南生幫手籌拍《過界》：「俞琤間天比高創作夥伴，經常收到好多年輕人嘅劇本，有次佢畀咗個劇本我睇，問我意見，我睇完同佢講『唔使拍，冇人睇』，不過位編劇劉韻文前前後後改到第十六稿，我忍唔住問俞琤：『似乎你一定要拍啦！』俞琤就話：『既然年輕人肯做又有創意，咪幫吓佢囉！』」施南生除了找來劉嘉玲及陳坤演出，更拉攏已多年沒有投資拍片的徐楓任出品人，施南生對電影的評語直接而中肯，沒有硬銷：「平凡而不失可觀性。」行事乾淨利落，不過人始終有弱項，一講到跟老公徐克的關係，她即打過哈哈說：「唔識答呀，呢啲私人問題。」
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！