漫畫網上盜版猖獗，這邊廂沙田龍頭漫畫店「龍城」也捱不住下月結業令人唏噓，那邊廂本港漫畫也像一池死水，銷量較全盛期暴跌八成。但本地著名漫畫家邱福龍「冇有怕」繼續奮戰，兩年前更自立門戶成立創作室「DARK」，喻意希望在黑暗中劃出光明，並重畫自己20年多前成名作《鐵將縱橫》作為新創作室的頭炮。雖然公司由首半年可獲利，演變至近半年每月虧蝕兩萬。但他始終堅信憑實力仍有生存空間，並正開拓內地市場：「你做得出色一定有人欣賞。」
近年坊間不少漫畫店相繼結業，邱福龍認為漫畫店不會絕迹，但巿場萎縮卻是事實：「無論日本、台灣所有漫畫嘅銷量都下跌，因為𠵱家唔興呀，啲人嘅人生同個電腦好似黐埋咗，拎住部手機玩一日。」
阿邱回憶漫畫界全盛時期，廿年暢銷作品每期曾可賣10萬本，但現時縱名列銷量榜三甲的本土漫畫，一期都只能賣1.1萬本，可謂差天共地。「以前好好搵，好似執金咁執；13年前最差都賣2萬幾本啦，1萬本的銷量廿幾年前係執咗笠㗎喇。」網上免費盜版漫畫，被指是近年漫畫業衰落罪魁，但邱福龍卻不怨人，他另有看法：「最重要是漫畫做咗咁多年都冇乜突破，新一代啲人咪冇乜興趣囉。」他坦言盜版漫畫網站多數在內地經營，難以杜絕，向當局反映亦作用不大。
阿邱直言覺得傳統武俠漫畫「有小小過氣」，讀者可能看厭了。因此他不敢鬆懈，每日由下午3時創作至翌日凌晨3時，12小時苦戰只為創新：「驚自己做唔到創新，你自己先要檢討下係唔係做緊重複嘅嘢。放鬆咗自己嘅話，想生存都難。」他推出的新版「鐵將縱橫」漫畫，由創刊時的新派武俠，漸引入到無限復活重生，以及類近天空之城，外星文明的情節，情節縱天馬行空卻大獲網友好評。
但叫好不等如叫座，盜版潮下漫畫界旺丁不旺財。49歲的阿邱一個人帶着10個助理創天下，一個月開支數十萬，又不想減手足人工，唯有向外發掘商機，「本地漫畫有好多線條，愈複雜，成本就愈大，日本無咁多線條，淨係靠香港巿場維唔到皮！」他正與不同的內地商家商討合作計劃，包括在內地出版以小朋友為對象的漫畫，但一切仍在商談階段。
記者要求阿邱即場畫出此刻對漫畫界前景的看法，他輕輕掃畫上色，15分鐘就畫好了一幅男子從黑暗中衝出光明的漫畫，他說畫中男子代表他：「他揸住支鋼筆代表漫畫業，佢好多汗即係做得好吃力，在黑暗中想衝出這個難關，撲向光明。當然你可以掉轉睇，咁樣就直奔落去下面喇，即係兩個睇法，視乎你點望。」
憑畫寄意，雖然吃力但不會氣餒，阿邱對前景始終抱着樂觀態度，「我又覺得呢行未去到咁差，只係驚自己做唔到啫，因為漫畫都有藝術成份，你做得出色一定有人欣賞。書係永遠繼續落去，電腦代替唔到。除非漫畫真係令我生存唔到，因為我只有這個技能，我唔做，我做咩呢？」
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange