今年係老牌英文報章《南華早報》創報110周年，話晒有成110年歷史，見證香港逐步發展，應該對香港世紀大事知之甚詳，但唔知係咪因為由紅色背景嘅王向偉做老總後，《南早》已經變「紅」早，所以對香港大事口味唔同咗，回顧歷史時只識唱好。
話說有「紅」早讀者發現，該報日前出版嘅110周年特刊，回顧過去110年香港大事時，竟然唔見咗港人至今記憶猶新，亦影響緊香港發展嘅兩件大事，包括89年六四事件前百萬人上街聲援北京學生，以及03年50萬人上街反23條兼倒董呢段歷史，但國金二期落成以及張國榮自殺，卻竟然都同沙士齊名成為03年大事，明顯有意令香港發生過嘅重要遊行「被消失」。
奇怪嘅係，超人李嘉誠開始賣膠花箒，卻竟然喺「紅」早心目中好重要，喺特刊中成為1950年嘅大事，估唔到一個李嘉誠以一敵百萬，喺「紅」早心目中勁過百萬上街港人，唔少人睇完覺得「嘆為觀止」之時亦嘆氣連連。
何俊仁：太明顯、太離譜
見證呢兩件大事嘅民主黨何俊仁話呀，《南早》明顯有政治審查，好似卿姐上身咁大叫：「太明顯、太離譜」，強調要數香港歷史，點可以冇咗兩次舉足輕重嘅遊行？
支聯會主席李卓人亦話，呢兩件本土民主大事竟然被消失，只能以三個字形容：「難以理解」，仲話最驚係「紅」早嘅編輯自主都一併消失。八方反問：「乜仲有㗎咩？」
mailto:[email protected]
足本收睇《亂噏24》x 楊千嬅；緊接落嚟 Miriam 繼續同你談談情, 吹吹水！
周一至周五《亂噏24》約定你： http://bit.ly/appletalk24