公司回購通常會喺股價低殘時進行，如果喺52周新高時玩回購，話冇後着都唔會有人信。內房股花樣年（1777）由10月底開始日日回購，截至噚日為止，已經連續九日出手，個價仲越買越貴，由初初嘅1.25元，買到噚日最高嘅1.44元，期間股價累升14%，噚日即市仲創埋三年新高𠻹。
究竟有乜嘢好消息，可以誘使公司頻頻回購呢？相信不外乎兩個原因︰分拆彩生活將成事，以及小額貸款業務上軌道。彩生活係乜東東？其實係花樣年旗下嘅物業管理服務公司，早喺今年8月，公司已宣佈分拆彩生活上市，並喺9月遞交補充文件，相信好事已近。截至6月底止，物業代理及物業經營服務分部利潤達7,260萬人仔，按年增長近倍，利潤佔比亦由6%大幅提高至9%，勢頭之勁可想而知，一旦分拆成事，花樣年價值肯定進一步釋放。
另集團旗下小額貸款公司合和年，於今年6月開業，主力為中小企及個體戶業務提供貸款服務。事實上，國務院發展研究中心早前提出嘅「383方案」，極力主張國退民進，相信會成為聽日展開嘅三中全會主旋律，花樣年以民營方式搞貸款，肯定得到國家支持。現價市盈率5倍，息率近四厘，如此便宜估值及高息，配合兩大新引擎，點秤都值博。
唐牛
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange