美股本周延續升空之旅，催化劑係兩份聯儲局研究報告，力撐量寬對經濟有利，並建議儲局去盡啲，等失業率降到5.5%至開始加息，雖然報告內容與儲局決策無必然關係，但好友聽到當然like爆，造就道指及標普500禮拜三再創新高。
不過，Tesla和Netflix幾隻升幅王近日表現麻麻，而道指運輸指數及追蹤中細價股表現嘅羅素2000指數亦逆市走低，可以係大市短期見頂先兆，值得留意。
儲局或修訂加息指引
聯儲局上周議息後，繼續玩沉默，唔肯或唔敢清晰表明幾時退市。不過，近日有兩位聯儲局高級官員，不約而同出報告支持儲局嘅量寬政策。
其中，貨幣事務主管英格利殊認為，儲局應該「去盡啲」，講明失業率落返5.5%前都唔加息，認為此舉對經濟更加有利。而儲局統計及研究部主任韋確斯則指出，美國的高失業情況對經濟嘅打擊超乎想像，建議儲局採取更「積極」和「大膽」的貨幣政策。例如容許通脹高於2%嘅目標水平，從而協助經濟復蘇。
有陰謀論者認為，兩份報告係儲局調高加息門檻嘅先兆，高盛首席經濟師Jan Hatzius就估計，儲局會趁明年3月啟動退市時，修訂失業率降到6.5%開始加息嘅指引。
形勢上，儲局退市無期，而匯市跟數據走。歐元本周繼續偏軟，兌美元低見1.3442，兌英鎊就創一個月新低。歐盟在禮拜二出季度報告，預測歐元區出年GDP增長1.1%，而失業率就維持於12.2%嘅新高，比之前估計略差。
與此同時，9月份的生產物價指數按年跌0.9%，創逾三年半的最大跌幅，市場遂揣測歐洲央行嚟緊或須再減息，以免步日本後塵墮入通縮困局。
另一邊廂，英國經濟就傳喜訊，服務業表現創16年最佳表現，其中業務同就業分類指數更錄得歷來及15年新高，帶動英鎊兌歐元升至一個月高位，執筆時歐洲央行未出議息結果，若央行暗示準備減息，歐元兌英鎊應該未見底。
就業改善 紐元看俏
商品貨幣走勢迥異，新西蘭第三季就業增長1.2%，失業率跌0.2個百分點報6.2%，更重要嘅係勞動參與率同平均工資都有所增加，反映就業市場係堅復蘇，唔似得美國咁水皮，純粹多咗人放棄搵工而令失業率下降，刺激紐元周三曾升到84.15美仙，創兩周新高，但係聯儲局退市陰霾下，紐元兌美元短期再升的空間有限，要突破上月22日高位的85.46美仙有難度。
不過，由於市場預期新西蘭央行出年加息，澳洲就應該冇條件加住，澳元兌紐元交叉盤應該仲有得跌。
奇兵
本欄逢周五刊登
足本收睇《亂噏24》x 楊千嬅；緊接落嚟 Miriam 繼續同你談談情, 吹吹水！
周一至周五《亂噏24》約定你： http://bit.ly/appletalk24