灰熊周三主場鬥塘鵝，大前鋒蘭度夫（Z-Bo）第一節都未完，就因為未婚妻（Faune、左圖左）作動，要趕去醫院陪佢而提早離場。蘭度夫再做老竇當然係喜事，但係球隊就冇咁好彩，除咗以84:99被客隊大炒之外，仲有兩名球員因傷退下火線，認真黑仔。
已經有一個囝囝嘅蘭度夫，第一節打咗8分鐘，就收到消息話Faune要生，第一時間走去醫院陪佢。灰熊亦喺官方twitter恭喜呢位32歲大隻佬：「蘭度夫啱啱離開咗球場，去迎接即將出世嘅小朋友，盡做爸爸嘅責任。恭喜晒呀，大隻佬！」小Z-Bo重7磅4安士，母子平安。
不過，灰熊就冇蘭度夫咁好彩，俾塘鵝喺比賽早段取得過10分嘅領先優勢。冇咗內線攻力強橫嘅Z-Bo，想挽回劣勢都有心無力，最後主隊以15分之差慘吞今季主場首次敗仗，兼且灰熊兩名後衞亦齊齊提早退下火線，貝歷斯喺第3節整傷右膝，攻入全隊最高26分嘅干尼，喺最後一節幫隊友米克米拿做單擋嗰時，俾客隊射手莫路一踭打到暈陀陀；好彩干尼經過檢查後冇乜大礙，周四應該可以練波，而貝歷斯傷勢睇嚟唔算嚴重，暫時列入每日觀察名單。
另外，騎士同日作客雖然以104:109不敵公鹿，但係狀元班尼特射入一球3分，今季跳投終於開齋，都係一種安慰。
足本收睇《亂噏24》x 楊千嬅；緊接落嚟 Miriam 繼續同你談談情, 吹吹水！
周一至周五《亂噏24》約定你： http://bit.ly/appletalk24