雖然新特蘭之前贏過場東北打吡，𠵱家排緊尾2，唔使包尾。不過，小弟就唔太信普耶可以起死回生，覺得「黑貓」今季都係凶多吉少。
新特蘭今夏狂買人，加加埋埋簽咗超過10個球員返嚟。細球會，太大想頭，向來都冇好結果，而迪肯尼奧就因為班舊球員唔服佢，而新球員又融合唔到，結果佢要執包袱走人。普耶嚟到之後，小弟覺得佢場場都係亂石投林，仲未見到佢重整到隊波嘅戰術同精神面貌。
首先輸俾史雲斯0:4嗰場，普耶排個4-3-3陣式出嚟，係用史提芬費查打中鋒，阿當莊臣同基亞卓尼利打翼鋒。到贏紐卡素2:1嗰場，佢就變陣打4-4-2，收起基亞卓尼利，用費查同艾迪杜里打雙箭頭。上周六輸俾侯城0:1，普耶繼續唔知想點，又打番4-3-3，但呢個4-3-3係新發明嚟，佢派晒波連尼、費查同艾迪杜里3個中鋒一齊出場，仲收埋阿當莊臣。雖然周中英聯盃贏咗修咸頓，但對手全隊副選，勝果唔可以作準。
可能連個天都唔鍾意新特蘭，上場對侯城兩個球員被逐，仲要輸球烏龍球，小弟簡直有種「天要你新特蘭輸波，你不得不輸」嘅無奈感覺。文：咖喱
足本收睇《亂噏24》x 楊千嬅；緊接落嚟 Miriam 繼續同你談談情, 吹吹水！
周一至周五《亂噏24》約定你： http://bit.ly/appletalk24