維基解密，愈解愈實，政府又試耍出成熟一項，轉移一項的慣技。689想戴頭盔，梁營瞓身幫老細攞威，撇甩TV，梁粉統一口徑制裁菲律賓，將來攞彩都能分一杯羹。（相反，一杯羹變鑊鑊甘，建制派都要揹住隻鑊跳船！）
制裁方案第一擊，全民罷食賓蕉。不時不食之餘，泛民之中，有人擲賓蕉的話，建制派可以抽其後腿，大造香蕉文章，乘機跣泛民香蕉皮，等敵人攤攤腰。海關加緊巡查，實行狙擊親泛民的師奶，夠辣蕉的。
對賓傭也照辦煮碗制裁，即時凍薪，葉劉帶頭呼籲中產阿mom絕不心軟個賓賓死老竇或者老公入醫院，唔會預支一個斗零的人工。阿賓去借貴利，全城槍口對外，大耳窿一樣唔睬阿賓。黑社會都有愛國的，貴利也有良心的，一於將賓國的GDP拉下馬，將阿三世當做馬尼拉薄熙來，兩兄弟同樣差不多摸到棺材蓋，放長雙眼睇，還笑得出嗎？