喺祖國上市嘅頁岩氣股，已經升到甩轆。香江呢邊，同瓣數股份逆市沉到半年低位。咁啱喺上星期，阿爺講到明會撐頁岩氣產業，資金埋身香江同業，為升浪展開序幕。咁多隻頁岩氣股當中，以宏華（196）最抵買！
中俄合作 定單肥仔水
先睇大局，據美國能源部估計，頁岩油及頁岩氣儲存量最多嘅國家，分別係俄羅斯及祖國。能源儲備已經係大國非常重要嘅課題，但中俄對呢類新能源嘅開探方興未艾。
據估計，2020年前，祖國喺頁岩氣行業嘅總投資額將會高達8,000億人仔。中俄兩大國開探頁岩氣嘅潛力無限，而宏華主打嘅鑽探機業務，喺嚟緊日子真係食到應一應，肥過肥仔水！
又今年3月，阿爺同俄羅斯公佈咗能源全面戰略合作，中俄一家親，宏華對嚟自俄羅斯所需鑽探設備，更加坐定粒六。事實亦係咁，單係今年7月至9月，宏華嚟自俄羅斯嘅合約有成11.6億人仔，相當於該集團今年上半年總收入近半水位。
連埋呢兩份單，宏華最新未入賬總值高達85億人仔，係去年度總收入50.7億人仔嘅1.7倍。嚟緊業績，亦肯定靚仔非常。係咁意估宏華今、明年嘅EPS增長40%，去到0.23元人仔及0.33元人仔，預測PE跌到得番8.4倍及5.9倍。根據大行專業評估，場內同行全部PE約15倍到20倍。
喺祖國上市同行又點？呢批股份，6月尾同A指同步見底，隻隻生猛。好似江鑽及恒泰艾普，累升40%至50%，而今、明兩年嘅PE，高達50倍及40倍！宏華PE，中港兩邊都至抵買，現價（2.44港銀）翻一番到4.9港銀計數，明年度PE都只係11倍多啲。
錢 雋
細價股專家
本欄逢周二、五刊出
足本收睇《亂噏24》x 楊千嬅；緊接落嚟 Miriam 繼續同你談談情, 吹吹水！
周一至周五《亂噏24》約定你： http://bit.ly/appletalk24