【愛不歧視系列二之一】
【本報訊】過去一年同志運動看似平地驚雷──4,000人上街不滿反歧視法諮詢被否決；歌手、名人、議員紛紛出櫃；W婚權案終院勝訴；同運合縱連橫宣示大愛。本報一連兩日刊出「愛不歧視」系列，回顧同志平權運動穿越時間裂縫，於人海中冒出清晰輪廓的這一年，以及記錄首個上街的平機會主席周一嶽，將如何在性小眾平權立法上下工夫。
記者：張嘉雯
在全球同運風起雲湧的一年，歌手黃耀明的日程表上沒有了錄音室這個地點，有的是跟他歌唱事業風馬牛不相及的立法會、7.1街站等，他多次挑燈夜寫立法會陳情稿，緊張得失眠；即使明知論述非自己強項，但直言如有需要，會跟明光社辯論。明哥不斷走出自己的「comfort zone」，為的是「斟茶遞水嘅阿姐、送信嘅信差都可以安心出櫃」。
「唔係完全冇錄歌嘅，咁樣錄囉。」夜深，黃耀明拿着iPhone向記者示範過去一年生活「出軌」，完全脫離了錄音室的經歷，他自言兩年前出櫃時只想到「empower the powerless」，但從無想過有天會成立「大愛同盟」，「嗰時都唔識阿Cyd，同何韻詩、慢必、Gigi都冇夾，全部都唔係喺我計劃之內」。
出席立法會 緊張到失眠
在舞台上揮灑自如的明哥，今年兩度出席立法會公聽會發言，形容心情「擔心過開show」、「緊張到失眠」，「要我講3分鐘嘢好難，因為要好理性，又唔擅於對住官員、公眾講嘢」。有了首次演講經驗後，他再次自己挑燈夜寫，把停頓位也寫好，「因為我想好好咁表達我嘅message，我覺得立法會應該要去多啲，唔好淨係畀啲唔係你選嘅人出嚟講嘢，唔夠人幫我哋發聲，我哋就要自己去講」。
今年7月，明哥再次「升呢」，與大愛另一成員何韻詩在非主場──7.1街頭處女嗌咪，原定半小時站台，結果企足四小時，直至最後一批遊行人士經過，「因為好感動，有啲睇起嚟好似唔係我哋盟友嘅人，好家庭、會遠離同志嗰啲巿民，原來唔係，啲公公婆婆會過嚟拍下膊頭，『我哋支持你呀，努力！』嗰刻覺得應該同佢哋撐到底。」
為別人充權的同時，明哥也被充權。常道已練成金剛不壞之身的他，在出櫃那刻沒有流過一滴眼淚，早前在一間銀行的分享會上，談起七一那天有父母抱着小孩捐錢給大愛同盟的場面，卻無法止住哭泣，因為一個20多年前的畫面，「有次喺街畀人認出，有個阿媽同個仔講，『呢個咪達明一派嗰個基佬囉，你唔好學佢呀。』」
明哥承認，出櫃後為了平權工作遲遲未能出新碟，今年要好好分配時間，「重投」歌唱事業，「呢一年認識咗好多同志組織，有協同效應，佢哋本身已做咗好多嘢，只係我哋係公眾人物，令人注意多咗議題」。
平權非小眾 籲市民上街
他認為在分工上，大愛強於軟性工作，如宣傳和教育，「明光社嗰啲（辯論）阿Cyd去得多啲，我論述能力冇佢哋咁強，但當需要時，我可以嘅」。
未來他會繼續為同志權益努力，他指平權並非單純性小眾的事，呼籲巿民明天上街，「所有小眾係唇齒相依，我哋嗰塊失咗守，聽日你嘅權利都可能被剝削，遊行係為社會公義，一個公義社會應照顧小眾」。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange