英超剛完成頭10周聯賽，無錯，𠵱家已經講降班真係言之過早，但小弟唔怕得罪諾域治同水晶宮球迷都要講一句，呢兩隊降班機會真係高唱入雲，最後一個quota係邊個？成為今季英超首支炒領隊嘅球隊，新特蘭理應都係大熱，不過小弟覺得「黑貓」仲有得救。
要留喺英超，一係講金一係講心；諾域治同水晶宮嘅組軍態度都好明顯，盡可能唔使大錢擴軍，留得幾耐得幾耐，最好就唔覺意打起一、兩個新星，高價賣畀富豪球隊，萬一降班都執到幾千萬鎊，到英冠等下一次升班機會，絕對唔會令球隊財政萬劫不服。講心，諾域治同水晶宮防線鬆散，鬥心欠奉，靠艾文達、巴桑、查馬克、加比頓等失意兵，真係睇見唔開胃。
新特蘭之前昆尼主政時期已經簽入好多貴價兵，近年同非洲財團合作，都算係一條新財路。「前朝」迪肯尼奧今夏簽入14名新兵，中型班都算係創舉，加埋史提芬費查、奧沙、阿當莊臣等原有球星，單單踢本土賽事，絕對有充裕嘅調動，隨時球會1月再畀多2、3千萬鎊畀新領隊普耶買人。講心，打吡戰對紐卡素一役，已經展示出鬥志，普耶球員時期已經係技術一般，不過拼勁十足，只要將呢種精神帶畀隊員，「黑貓」前景都唔差。文：牽牛
足本收睇《亂噏24》x 楊千嬅；緊接落嚟 Miriam 繼續同你談談情, 吹吹水！
周一至周五《亂噏24》約定你： http://bit.ly/appletalk24