港視不獲特區政府發牌，搞到旗下幾百個藝員同員工手停口停，不過港視兩個BB黃美棋同黃芷晴，反而因呢件事人氣急升，近日多咗出騷搵錢，可謂塞翁失馬，焉知非福。噚日兩位BB又各自出席活動，美棋BB同陳豪及蒙嘉慧到圓方出席遊戲機騷，佢承認近日多咗job：「多咗好多，多謝客戶記得有港視呢班artist，不過多咗幾多收入就未計。」咁想港視有牌定係自己接多啲騷？美棋BB話兩樣都想，因為出活動係自己一個，但發牌就全部人都有工開。
蒙嘉慧唔睇電視
提到無綫嘅《東張西望》俾人話公器私用踩港視，美棋BB話佢哋唔應該有立場，唔播可能情況冇咁僵。王維基話如果6個月內搞唔掂發牌就唔再搞，美棋BB話：「都驚，不過未搵出路，可能要打熱線，我又唔可以去扎鐵。」亦為港視拍劇嘅蒙嘉慧同老公鄭伊健都鍾意打機，仲話屋企電視已用嚟打機，好耐冇開嚟睇電視。
至於黃芷晴就同姜麗文及王子涵噚日喺銅鑼灣出席時裝活動，透視谷胸嘅芷晴同露腰嘅王子涵搶晒鏡。黃芷晴前日同老竇黃日華一齊去政總支持港視，港視冇牌係咪反而帶挈多咗工作？芷晴話：「係多咗，開心客戶揀我哋。」寧願港視有牌多過自己有嘢做？佢笑話：「最好有牌又多嘢做。」姜麗文亦話呢排多咗工作，但佢話寧願港視有牌：「收入冇影響，因為王生（王維基）每月仲有出糧。」
撰文：馮仁昭
足本收睇《亂噏24》x 楊千嬅；緊接落嚟 Miriam 繼續同你談談情, 吹吹水！
周一至周五《亂噏24》約定你： http://bit.ly/appletalk24