堪稱地上最强嘅巨龍瞓咗成億年，終於瞓醒嘞，仲𠱁得林鄭好開心。林鄭噚日去科學館主持「巨龍傳奇」展覽開幕，見到識郁識叫嘅機械暴龍，笑到四萬咁口。佢話自己兩位公子細個時都係恐龍迷，次次講起恐龍都停唔到口，唔知佢會唔會搵埋囝囝一齊嚟重拾童真呢？
7隻機械恐龍進駐科學館，今日開始有得睇有得玩。拎起司令棒掂一掂迅掠龍嘅頭頂同雙手，佢即刻擺出發惡樣；又可以控制有强健肌肉嘅暴龍噴氣怒吼，嚇吓朋友。館方仲搵咗真人扮南方獵龍，雖然露出對腳有啲穿崩，但勝在盞鬼！呢條醒目恐龍聽日同下周二分別去天水圍同尖沙嘴文化中心做親善大使，任影唔嬲。
展覽仲展出大量恐龍化石，最堅嘅巨型祿豐龍骨架模型有七成係真化石。至於河南出土嘅巨型汝陽龍14節背椎骨化石，直徑有68厘米闊，係目前保存得最完整嘅同類化石，配合埋隔籬天花板咁高嘅炳靈大夏巨龍骨架模型，夠晒氣勢。馬會贊助1,300萬搞恐龍展，董事范太自然畀面撐場，佢仲講笑話希望唔好重演《翻生侏羅館》嘅場面！
足本收睇《亂噏24》x 楊千嬅；緊接落嚟 Miriam 繼續同你談談情, 吹吹水！
周一至周五《亂噏24》約定你： http://bit.ly/appletalk24