周三雖然係歐聯夜，但我求大俠就覺得美職季後賽東岸4強次回合，由常規賽冠軍紐約紅牛迎戰侯斯頓戴拿模先至最筍，因為兩隊喺首回合打和2:2，而坐擁亨利及卡希爾等星級球員嘅紅牛，冇理由唔喺主場拼盡，淘汰戴拿模。點知，人算不如天算，紅牛喺領先下被逼和1:1，加時仲要輸埋；結果都係宿命難違，連續4年喺季後賽4強出局。
猶記得喺次回合賽前時，我求大俠誇下海口，話如果一生只賭一場波，紅牛呢個單W就機不可失；因為紅牛喺今屆常規賽的確表現出色，唔單止係東岸冠軍，仲首次成為常規賽盟主，其中今屆聯賽主場，更只係輸過兩場咁大把。而紅牛嘅教練柏基亦同樣咁寸嘴，佢喺賽前記者會被問到紅牛怕唔怕4強出局魔咒時就話：「乜嘢魔咒呀？我從來唔係一個迷信嘅人，唔相信有魔咒呢回事！」
加時被戴拿模「宰殺」
可惜，紅牛喺周三嘅次回合，雖然取得主動又佔盡優勢，仲要由巴利胡禮菲臘斯先開紀錄，兼亨利同卡希爾等都有唔少入球機會，但因為中堅施卡耶一次犯錯，被戴拿模追平1:1，紅牛嘅1.6倍單W就咁見財化水；而最慘嘅仲係喺加時期間，戴拿模前鋒奧馬甘明斯把握一次機會，助球隊反先2:1，而紅牛嘅季後賽之路，亦因為咁而終結。
值得一提嘅係喺首回合，又係奧馬甘明斯嘅補時階段入波，幫戴拿模追平2:2，今次又係佢壞紅牛嘅大事。難怪紅牛柏基賽後「死晒狗」咁話：「原來可能有啲魔咒真係打破唔到嘅！」
卡希爾：佢哋有神奇力量
紅牛中場卡希爾就話：「戴拿模真係有神奇力量，佢哋往往可以喺最唔可能嘅情況下，造出令人驚訝嘅成績；我衷心祝福佢哋可以順利成為季後賽冠軍，咁樣我哋嘅出局都算值得啲。」戴拿模晉級之後，將會同肯薩斯體育會爭入總決賽。肯薩斯喺同日戰至加時，先以3:1挫新英倫革命，兩回合計以4:3晉級。
足本收睇《亂噏24》x 楊千嬅；緊接落嚟 Miriam 繼續同你談談情, 吹吹水！
周一至周五《亂噏24》約定你： http://bit.ly/appletalk24