胡杏兒日前為時尚與美容雜誌《add》擔任封面女郎，自與黃宗澤分手後，杏兒看上去是感情絕緣體，原來她很享受單身生活，不願結婚。
「唔啱就解決」
杏兒說：「我唔想結婚！之前見家姐出嫁都會有憧憬，但係人會變，我𠵱家覺得拍拖就足夠。結婚要犧牲好多，唔係，應該話同一個人結婚係希望一生一世，所以要諗得好清楚。有啲人好想結婚生小朋友，但我一定唔係呢種人，我諗我比較鍾意我嘅事業。我唔會為咗想拍拖而拍拖，要遇到一個合適嘅人，但我𠵱家好享受單身生活，覺得好自由。」
不時會傳出杏兒與黃宗澤（Bosco）復合的消息，她坦言自己是個利落的人，杏兒說：「我敢愛敢恨，即係如果一發覺唔啱就會直接快速咁解決，因為我冇太多時間可以浪費。」提到擇偶條件，她說：「我又唔抗拒圈內人，最重要係我鍾意佢，當然佢都要鍾意我，我希望佢最好比我高，因為我好鍾意着高踭鞋。」
每年一度的台慶頒獎禮即將舉行，身為無綫的當家花旦，今年並不是大熱，她笑說：「今年我唔係大熱，所以冇太大壓力，最緊要打扮得靚靚出席盛會。」而入行多年的杏兒似乎也生了厭戰之意，她說：「其實我都有意欲減少產量，想拍少一啲，一年拍咁多齣劇演咁多個角色，會令觀眾混淆。」（詳細內容請參閱第28期《add》）
老友陪賀34歲
此外，杏兒前天剛度過了34歲生日，一班同事好友在微博上載了為她慶祝生日的相片，陳敏之、黃智雯與李思捷等送上祝福，戴上大型花花頭飾的杏兒一臉幸福。
撰文：林妃
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！