天氣轉涼是「濕平」的絕佳藉口，Samantha近排發現有個外國時裝網站，價錢同Zara差唔多，勝在可免費退貨！咁頂爛市法，成本一定睇得好緊，佢哋每件衫來自唔同地方生產，見過泰國、巴基斯坦等，就係未見過強國，這解釋點解棉花期貨最近跌近一年低位。
面對東盟和中東競爭，強國棉花需求跌，市場擔心佔全球棉花庫存60%的中國，會出售部份存貨，世界工廠美譽失色，不代表中下游紡織股冇得炒，德永佳（321）上月尾發盈喜，料中期盈利顯著增加，因棉花價格下跌帶動紡織業務毛利。
成立近40年港資針織廠的德永佳，有很多國際大品牌幫襯，出口至歐洲和北美佔比不輕，呢啲品牌願以較高成本換好質素。公司年報話，美零售有改善，棉花價格趨穩，今年增加投資紡織業務，盈喜證明公司方針正確。
紡織業務去年營業利潤減少21%至5.46億元，毛利率兩年維持20%樓下的五年低位。本欄曾提到德永佳旗下的Baleno生意吃力，要狠關241間舖，不過存貨大減26%至19.92億元，零售銷情雖然未見起色，但勝在減肥成功，輕身上路，唔使做陀衰家，股價橫行多日昨錄得大成交，可在業績前衝刺。
Samantha
本欄逢周一、三、五刊出
足本收睇《亂噏24》x 楊千嬅；緊接落嚟 Miriam 繼續同你談談情, 吹吹水！
周一至周五《亂噏24》約定你： http://bit.ly/appletalk24