泰國A每年年尾，為朋友「團購」花膠，以佢嘅人脈及面子向海味莊買貨甚平，再以同等價錢轉售俾我哋，我哋梗係一致讚好，多謝佢熱心為人啦。泰國A仲好人到親自送貨上門，呢日就拎住兩斤花膠登門，左丁山連忙拜謝，佢送來之花膠，貨真價實，比市價便宜，品質上等，自己去買喎，無謂嘥精力。泰國A除花膠外，還送上一份泰國消息剪報，佢話：「泰國僧王逝世，香港報紙竟然鮮有提及，反而白龍王過身，就當作世界大新聞，其實白龍王與僧王簡直冇得比較，僧王高高在上，地位尊崇，有乜理由香港報紙只識白龍王，不理僧王？我氣憤之餘，特別拎份剪報俾你睇吓！」
吓，咁睇得起左丁山，唔識泰文嘅喎，不過泰國A吩咐到，唯有話：「會研究吓。」送佢離開之後，急急將泰文專欄電郵俾泰國校友S，請佢繙譯，校友S果然得閒，炒樓之外別無餘事，居然在六個鐘頭之後，左丁山放工之前，就將英文譯文電郵過嚟，另外一位在中大就讀嘅泰國學生P，亦幫手搵到一份10月24日美聯社自曼谷發出嘅通訊，於是左丁山略知一二。
泰國佛教僧王（英文叫Supreme Patriarch） Somdet Phra Nyanasamvara （名字嘅中文意思係「大智者」）在佛曆2532年（即係西曆1989年）登位，在位24年，生於1913年10月3日，逝於2013年10月24日下午7時半，享壽一百歲。僧王在2002年11月20日已因身體不適進入朱拉隆功紀念醫院，2004年開始由一位副手協助處理僧王職務，但副手今年逝世，繼承人有待泰皇委任。僧王逝世後，泰國政府機關下半旗三日致哀，政府官員穿着黑色衣服15日，以示哀悼。
剛逝世之僧王嘅地位尊崇，除咗係泰國佛教徒（佔六千七百萬人口之九成）之宗教領袖外，亦因為佢14歲出家，一生鑽研佛學，學問高深，而且在1956年泰王蒲眉蓬按習俗當僧人15天之時，佛寺內嘅傳道老師就是這位僧王。佢生前為弘揚佛教，全世界到處跑，1993年受中國政府邀請到中國促進佛教交流，但美聯社報導，佢與達賴喇嘛亦是好朋友，達賴視他為兄長！