最近網購界有一大事，行業龍頭Amazon同另一間快速消費品大佬P&G合作，P&G容許Amazon的團隊直接進入兼長駐喺佢哋個貨倉。咁意味未來你喺Amazon落order買洗頭水同尿片，貨品將會直接由P&G個倉，出貨送到去你屋企門口。
有採購企業的管理層朋友形容，Amazon呢一舉動，對業界嚟講稱得上係晴天霹靂：如果呢個模式證實咗work，進一步擴展開去，條供應鏈未來可以由生產商直接出貨畀消費者，咁請問仲要中間那一班採購和中介做乜？
今次嘅新招，對Amazon和P&G來講都相當有利。首先Amazon可以慳番唔少存倉成本，原本賣廁紙、尿片呢啲低margin產品，又佔地方又難賺錢，網購商無咁大incentive去搞大佢。但𠵱家Amazon直接透過P&G出貨，自己慳番嘅倉位就可以用嚟擺其他高增值消費品；P&G慳運費之餘，亦可得到Amazon幫佢推網上銷售，長做長有。
《華爾街日報》報道，Amazon已至少同3間快速消費品企業傾緊合作。遊戲規則已改，零售商嘅經營環境，只會越來越難捱。
海迪
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange