港交所（388）近年鼓勵上市公司增加女董事，女性喺金融界嘅地位越來越受到重視，彭博噚日舉行一個座談會探討女性喺香港經濟上扮演嘅角色，請到金融發展局主席查史美倫做嘉賓。查太自爆，年青剛加入法律界嗰陣，都有俾男同事揶揄「早收工」，但佢堅持女性事業與家庭係可以平衡到嘅。
查太1972年喺美國大學畢業，即刻走去同查懋成結婚生仔，年近30歲先決定修讀法律，投身法律界，之後回港發展，事業算係一帆風順，做過證監會副主席、中國證監會副主席，𠵱家仲係行政會議成員。
查太噚日有感而發，話做成功女性真係唔係易㗎。佢憶述，當初出嚟律師樓做嘢嗰陣，晨早返工，夜晚七點鐘先放工，對於佢呢位已有一對仔女嘅女性嚟講，已經覺得好夜，但係都有男同事問佢點解咁早走，仲話「一日先過咗一半咋喎」，令佢感到好無奈。
提倡企業彈性上班
咁又係喎，查太長子查燿中今年39歲，細女36歲左右，計番轉頭，查太讀完法律執業之初，仔女只得幾歲，正常做阿媽嘅都想分配時間陪仔女，唔想人生只得工作同埋工作啦。
由於有個人體會，所以查太就提倡，企業應該提供彈性工作時間同地點，咁先至可以吸引多啲有能力嘅女性重新投入金融界，在場人士聽到當然即刻讚好。
李華華
mailto:[email protected]
足本收睇《亂噏24》x鄭中基谷德昭；跟住有新紥師妹楊千嬅駕到！
周一至周五《亂噏24》約定你： http://bit.ly/appletalk24