唔少建制派噚日因為唔敢就特權法表態，頻頻走後門避開傳媒，但一早表明反對特權法嘅葉劉淑儀都要走後門，點解呢？葉劉自爆早前出席葉國謙娶新抱宴會期間，身上着住嗰條有長拉鏈嘅連身裙突然爆開，最驚春光乍洩，拿拿臨拉住阿囡入女廁，用大頭針幫佢扣住爆開位置，最後尾為避傳媒仲要喺後門走人，趕返屋企換衫轉戰另一宴會，笑稱「希望冇蝕底到啦」。
葉太話件衫係法國牌子Lanvin，寫明法國製造，唔係中國或東歐出品，估唔到咁化學，搞到狼狽不堪，仲話「好彩我生咗個女，可以喺女廁幫我釘扣針，如果生仔就死嘞」。出事翌日，葉太去連卡佛投訴，要求店方改裙，希望唔會再出事。原來件衫原價萬幾蚊，葉太喺夏天以七折購入。阿謙新抱李恩盈則來頭不小，係李福兆孫女嚟㗎。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange