電視發牌事件之所以受低估，同當年曾蔭權政府低估80後反高鐵運動如出一轍。政府一直落後於社會形勢，當年曾朝政府低估了香港九七後成長一代對地產霸權嘅反感，仍停留在八十年代以為人人只要有機會買到太古城就OK，殊不知年輕人價值觀已改變，追求回歸基本、反消費主義、追求本土認同。
此落差到曾落任相信也不明白，政府只籠統歸咎於年輕人欠缺社會流動而對政府產生不滿，將香港社會出現範式轉移先兆錯誤地定性為青少年問題。電視發牌事件，政府斷估唔到一個王維基可以引動十萬計群眾，以為只要閉嘴，在傳媒燒一陣就會俾其他議題蓋過。
社會角力嚴重 衝突頻生
但事件背後同樣涉及八、九十年代霸權嘅反動，猶如反高鐵背後其實係反地產霸權一樣。TVB霸權之厭惡，早在幾年前在網絡社群內發酵，當時神劇《天與地》獲網民力撐，亦反映咗新生代對TVB主流婆媽情愛電視劇嘅反動。香港社會猶如火山爆發前，岩漿早就在地下蠢蠢欲動，找尋地殼空隙，出現各式小規模爆發。政府欠缺社會分析，對社會事件解讀水平太低，所以先至對發牌一事掉以輕心。
現在掌權一代，係獅子山下一代，即使有大學教育水平，但價值觀相對落後，佢哋根本就係TVB觀眾群，亦係雞汁May姐支持者，唔會明白新生代對TVB為何不滿。呢個gap一直存在於官民之間，在不同社會議題之間產生衝突。造成政府落後於社會，有結構性一面，美國民眾選出了一個代表facebook世代嘅少數族裔總統，其他地方如北非，就由年輕人起義，推翻獨裁政權，種種迹象已表示，互聯網empower新一代，令社會代際之間角力日益嚴重，價值觀衝突更形尖銳。
無疑，電視發牌事件可以強行壓低，等待新議題取而代之，好似陳茂波一樣，唾面自乾捱過去，但呢種價值衝突唔會消失，猶如當日拆走天星碼頭，結果引出了更大型80後反高鐵運動，今次HKTV，亦會同樣，大家唔使等好耐，明年七一見真章。政治上嘅落後生產力，定會比時代淘汰。
添馬男
足本收睇《亂噏24》x鄭中基谷德昭；跟住有新紥師妹楊千嬅駕到！
周一至周五《亂噏24》約定你： http://bit.ly/appletalk24