早排去旺角百老匯戲院睇戲，隔籬位係一名強國人。正當劇情進入戲肉之時，忽爾傳來令人躁底嘅膠袋聲，未幾隨即傳來陣陣橙香！佢竟然正在搣橙！心裡暗罵之際，手已被橙汁彈中。這就是傳說中的文化差異。
查實排隊等入場條人龍中，有唔少都係強國人，證明佢哋好鍾意落香港睇戲，難怪連電影人黃百鳴旗下間天馬娛樂（8039），都決定租走朗豪坊間戲院踢走UA。
有留意開港產片嘅都知，天馬娛樂嘅戲都係主攻大陸市場嘅中港合拍片，除咗賀歲片《家有囍事》系列，其他作品有《開心魔法》、《男人如衣服》、《忠烈楊家將》等。香港人唔啱睇？唔緊要，因為強國觀眾先係佢最大目標，所以喺強國人最多嘅旺角搞院線，都唔係冇道理。
朗豪坊戲院位置極靚，加上UA片種多兼國際化，上年繼續係全港票房最高嘅戲院，高達1億元，確係合理。不過，天馬院線細，未必套套收得嘅戲都買齊番去播，二來預計戲院主攻強國人，所以華語片比例會高，至於自家製作更加會勁播。不過據黃百鳴過去兩次搞院線嘅經驗，最後成績都麻麻。咁仲可唔可以keep住高收入？真係有待觀察。菲菲唯一希望係易手後，唔會多咗人喺戲院食橙。
Fifi
本欄逢周二、四刊出
足本收睇《亂噏24》x鄭中基谷德昭；跟住有新紥師妹楊千嬅駕到！
周一至周五《亂噏24》約定你： http://bit.ly/appletalk24