唔少港視藝員似足日本神劇《半澤直樹》嘅角色，但有眼利市民卻發現，無綫台慶劇《On Call 36小時II》嘅演員，卻掉返轉好有名醫影子。例如由吳啟華飾演嘅病理科顧問醫生洛文笙，就係翻版袁國勇；郭政鴻做嘅心胸肺外科護士長呂小益，擺明照dub梁智鴻個造型。唔知「被抄襲」嘅兩位香港名醫，會唔會覺得男主角個look仲差啲啲？
話說呢套劇喺第一集，話香港爆發一種由外國傳入嘅變種傳染病，仲要喺醫院隔離病人，情節熟口熟面，查實係反映緊2003年嘅沙士。
郭政鴻講嘢狂眨眼
而喺呢一輯先加入嘅新角色洛文笙醫生，喺劇中專責用高科技研究病毒，又分析病理，最後解決咗個問題；咦，港大微生物學系講座教授袁國勇，當年都有專責研究，仲有份發現沙士「真身」係冠狀病毒喎。
要抄就梗係要抄到足！除咗洛文笙嘅工作性質，就連佢嘅造型亦好有袁國勇影子，事關中山裝款嘅拉鏈外套，一直係袁國勇嘅標記，而洛文笙同佢嘅研究團隊，清一色着企領中山裝醫生袍喎，加埋副斯文眼鏡，袁國勇話唔似都唔得啦！
雖然呂小益唔係醫生而係男護士，但好多市民一睇佢個造型，即刻覺得熟口熟面：中間分界加上圓碌碌眼鏡，講嘢偶爾狂眨眼，嘩，之咪係有「金刀梁」之稱嘅外科名醫梁智鴻嚟㗎囉。有口痕友話喎，如果呂小益棚牙哨少少，激似度會達9成9！
mailto:[email protected]
足本收睇《亂噏24》x 鄭中基谷德昭；跟住有新紥師妹楊千嬅駕到！
周一至周五《亂噏24》約定你： http://bit.ly/appletalk24