黃百鳴（真名：黃栢鳴）旗下天馬娛樂（8039）早兩日宣佈唔止拍戲，仲打算搞埋戲院，已經租落旺角朗豪坊𠵱家UA戲院個位，租期由明年7月開始，租約長達10年。
明年7月起租
黃百鳴阿仔兼天馬執董黃子桓（Edmond）噚日透露，天馬將由明年中開始自己營運呢間戲院，即係會踢走UA！至於新戲院有乜特色、叫乜名，Edmond好孝順咁話，都係留畀阿爸遲啲講比較合適。
佢只係話，一定會重新裝修間戲院，準備以新面目示人，亦會好似一般戲院咁做生意，唔會特別偏幫天馬嘅出品。
查實黃百鳴以前都搞過東方院線同東方天下院線，可惜成績一般，汲取經驗，今次捲土重來真要拭目以待。
足本收睇《亂噏24》x鄭中基谷德昭；跟住有新紥師妹楊千嬅駕到！
周一至周五《亂噏24》約定你： http://bit.ly/appletalk24