相信睇開各大行報告嘅股民，都會發覺有啲分析員嘅分析真係好「狠」，可以將一間大公司踩到一文不值，將目標價削到同零無分別。
最好例子就係里昂分析師樂天虎（Scott Laprise），舊年9月尾突然出咗一份「falling apart（瓦解）」的大行報告，將「股神」畢菲特有份嘅比亞迪（1211）目標價狠削95%至0.41元！
比亞迪當時做緊約15元左右，份報告驚嚇度「十分」，但效力就「零分」，比亞迪噚日收38.7元，升咗超過一倍啦。
分析員另類出位妙法
第二個例子，就係專唱淡零售股嘅瑞銀「星級分析員」梁裕昌，今年3月中預言，利豐（494）隨時驚見2.5元超低價（當時利豐做緊近11元左右）。
不過，今次又係無乜力嘞，發出驚嚇的報告到𠵱家，最低都只係見過9.54元，說好的2.5元呢？又一次證明，係只得個「嚇」字啫。
今次梁裕昌又出手踩「鞋王」百麗（1880），削目標至6.5元，維持沽售。指百麗成日大減價，短期可以吸引客仔嘅，整靚盤數，不過長遠就無效。仲話啲鞋減到300幾蚊對都唔值！
之不過，百麗個股價又真係企得好硬噃，昨日不跌反升收報10.46元，睇得出股民都已經對個份「驚嚇」報告無乜反應嘞。
但係換另一個角度嚟睇件事，要喺咁多位分析員中突圍而出，寫得準與唔準，還重要嗎？
瑪姬兒
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange