雖然近日電視界再起風雲，唔少舊員工炮轟無綫刻薄，但無綫本月19日慶祝46歲生日，台慶咁大日子，台前幕後都要拋開唔開心，安排小生花旦進行唔同環節嘅綵排，姐仔沈卓盈、龔嘉欣、林夏薇同陳自瑤（YoYo）一組表演花式足球，佢哋平日好少做劇烈運動，姐手姐腳排練下，手腳瘀痕纍纍，沈大師日前仲喺Instagram貼咗右手手踭大撻瘀相，網民都馬上呵番佢。
彎腰趴地
沈大師、龔嘉欣、林夏薇同YoYo，日前又返咗將軍澳電視廣播城同陳百祥綵排，四位小花換上輕便運動裝，聽從導師指示，拎住足球練習簡單動作，遲啲再配埋音樂練節奏跳舞，沈大師同龔嘉欣要彎住腰，將足球放喺背部碌嚟碌去，好考佢哋嘅平衡力。YoYo就要趴低，雙手按地，兩腳向後拗，足球就放喺pat pat保持平衡，睇落簡單，但實則都有一定難度，生完BB年幾嘅YoYo火速收身，佢動作都算靈敏。
四女連日練習都練到周身瘀，YoYo話：「有個動作要我哋坐喺波上，有時我失重心跣低，手踭最易瘀。」導師要求四女動作一致，否則要罰留堂，大家為免累街坊都打醒十二分精神。龔嘉欣都話：「成日要瞓喺地，背部瘀咗一大撻，唔算好痛，但排練真係運動量大，攰到散咗，但為咗大家出鏡動作協調啲，我哋四個好乖，綵排完各自拎足球返屋企再自行練習。」沈大師學精咗，帶住藥膏傍身。
撰文：馮仁昭
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com睇番足本網上版，除咗有專訪外，仲有好多時裝靚嘢睇！