上星期全城追博雅（434），同蘋果及大師心有靈犀一「雅」通，實在係無得頂！睇睇佢下星期「隆重登場」嘅走勢！
講起沈大師，上星期Pro J喺極度繁忙嘅日程表中，抽空出席佢嘅talk show，仲有幸喺中場同大師打咗個招呼，呢啲嘢一定要做，大師係值得畀面，之後走咗佢都唔會話你啦！哈！
Talk show入面，大師苦心經營咗一個神探嘅形象，最堅抽嘅，係佢大學時代嘅相，當時嘅大師好瘦，仲同紅唇王子——蔡楓華一樣！佢老哥仲識得彈結他，我一睇幅相就知道嗰個係F Chord，真係那些年，嗰度火係堅啲！
大師talk show有冇串人，仲使講，梗係有，不過比我想像中溫和，佢喺網台串得犀利好多，博大家唔係成日都聽網台呱！其實最緊要大家睇得開心咪ok囉！你問我，其實大師嘅表現已經好好！
唔好以為上台亂吹好簡單，成個show有製作、有主題！有行家同我講，話talk show可以講多啲揭秘嘢，理念係好好，但執行上有困難！
點都好，全場爆滿，我自己都係真金白銀買咗張VIP飛，「銀碼事小，畀面事大」！期待沈大師part 2，通常反應好就會有，到時Pro J彈結他，大師唱歌，應該會更爆，幫你彈一隻歌，唔收錢，自己友嘛！
三太理應叻過龍仔
講開搵股，澳門勵駿（1680）又喺Pro J眼前閃過，由兩個幾一嘢升上四個幾，𠵱家半空自製宮崎駿嘅「天空之城」，又唔跟黃金比率回調，成交又少，我又唔識佢哋。
不過當凱升（102）炒上之後，三太太無理由叻唔過龍仔，用呢種方法思考，都係嗰句，繼續追蹤，出發！
徐燦傑
中國銀河國際財富管理主管
本欄逢周三刊出
足本收睇《亂噏24》x 鄭中基谷德昭；跟住有新紥師妹楊千嬅駕到！
周一至周五《亂噏24》約定你： http://bit.ly/appletalk24