噚日提過嘅盈喜股彩星玩具（869），一度又爆升8%，保守估計下半年盈利較上半年倍增（以忍者龜𠵱家喺美國嘅氣勢，盈利倍增絕對唔誇張），現價市盈率只係七倍咁上下，尋頂之旅肯定未完，不過，由於累積升幅已大，短線肯定有獲利盤出籠，未上車嘅戰友，只宜候低吸納。
如果嫌彩星玩具走勢太chok，不妨考慮佢阿媽彩星集團（635）。本欄曾於9月初推介彩星集團，當時設中線目標價10元，該股噚日最高位11.14元比較，兩個月已超標逾一成，挾着彩星玩具超強氣勢，可將目標價上調至14元，潛在升幅三成。彩星集團持有彩星玩具58%股權，以後者噚日市值43.8億銀計，前者持股市值達25.4億銀，較其最新市值25.2億銀還要高，反映彩星集團走勢嚴重落後阿仔。
除玩具業務外，彩星集團主要涉足物業投資，所持磚頭全部正貨，包括廣東道彩星集團大廈、中半山麥當勞道多個住宅單位，帶挈上半年租金收入倍增至逾億銀。彩星集團最新每股NAV達20.3元，現價市賬率僅0.53倍，年度化市盈率更不足兩倍，用平靚正形容絕不為過，想食正彩星玩具嘅升浪，又承受唔起股價坐過山車嘅風險，彩星集團絕對係你杯茶。
唐牛
足本收睇《亂噏24》x 鄭中基谷德昭；跟住有新紥師妹楊千嬅駕到！
周一至周五《亂噏24》約定你： http://bit.ly/appletalk24