聯賽踢咗10輪，好多水貨前鋒都現晒形。英國《每日郵報》列咗12個水貨射手出嚟，佢哋轉會費總值1.12億鎊（約13.8億港元），但加埋只係入得5球咁大把！其中祖維迪最貴，要成2,200萬鎊，但對於曼城嚟講，濕濕碎啦。
我求大俠反而覺得安祖卡路爾就最水，因為韋斯咸大嗱嗱拎咗球會紀錄嘅1,500萬鎊出嚟，但佢𠵱家一場都未踢過。
卡路爾由腳傷到胃
卡路爾上季由利物浦外借到韋斯咸，踢得幾好，雖然季尾受傷，但領隊艾拿迪斯有情有義，決定買斷佢，點知原來買咗隻玻璃腳返嚟！卡路爾右腳一傷再傷，去過比利時同荷蘭睇醫生，都叫做慢慢復操。不過，呢位英格蘭中鋒近幾日胃痛，打亂晒計劃。
韋斯咸內部消息話：「安祖好沮喪，過去5日，佢個肚好痛，胃部不適。雖然胃病係個打擊，但佢嘅狀態一直慢慢上升。」唉！畀個胃病搞一搞，都唔知佢幾時先可以復出。
祖維迪睇得得B學英文
曼城4大前鋒入面，祖維迪上陣最少，一來佢有傷，二來佢仲未適應英國環境。為咗幫助祖維迪同其他外援速成英語，曼城領隊比歷連尼推薦佢哋每日返去睇卡通片，包括喺香港都有播過嘅《天線得得B》。希望卡通片真係幫到祖維迪啦，話晒佢喺意甲嗰陣真係幾勁㗎。
睇完個水貨名單，最黑應係諾域治，佢哋兩大新加盟前鋒都做咗水貨。雲禾夫斯雲高同加利賀柏，加埋身價超過1,300萬鎊，但共喺英超只係入過一球；難怪𠵱家「金絲雀」同榜尾水晶宮並列為英超攻力最差嘅球隊，10場只入6球啦。
唔爭在講埋水晶宮，佢哋用600萬鎊喺彼德堡買入杜韋加爾，但呢位前鋒10場入得兩球。英國最近盛傳，水晶宮搵緊前皇家馬德里助教、摩連奴前助手卡蘭卡做領隊，睇吓最後成唔成到事，又可唔可以激活到杜韋加爾啦！
足本收睇《亂噏24》x 鄭中基谷德昭；跟住有新紥師妹楊千嬅駕到！
周一至周五《亂噏24》約定你： http://bit.ly/appletalk24