【本報訊】立法會今表決是否以權力及特權法要求政府公開免費電視發牌的文件。議事廳內有泛民議員為民發聲；政總外則有留守逾17日的「10壯士」、港視職工會成員及藝人，號召市民到場聲援。集會約在今午2時開始，逾四萬市民的簽名亦會交到掌權者手上。不過，親建制團體據稱今亦會號召逾千人到場「打對台」，反港視、撐政府。
記者：朱雋穎 林偉聰 潘柏林 何慧斯
港視職工會今日發起「全民大召集」，第一輪集會於下午2時開始，第二輪於傍晚6時。工會將在公民廣場及立法會外空地設大屏幕，直播立法會議事廳內議員的辯論及表決情況。屆時亦會有嘉賓到場發言，並有港視前新聞部員工在現場作會議即時分析。工會呼籲市民下班及放學後，到政總外聲援。
港視員工連日兵分多路收集市民簽名，今日透過不同形式公告天下。港視職工會連日來在旺角、尖沙嘴及銅鑼灣設街站，收集到逾四萬個市民簽名，職工會把有簽名紙條釘在逾70塊長黑布上，打算今日將黑布全攤在公民廣場上拍照，並將部份黑布交給建制派議員。10名留守逾17日的港視前員工，連日來亦在公民廣場收集簽名，今早10時會交給泛民議員轉交建制派議員。職工會及10壯士都期望建制派議員看清真正民意，憑良心投票。
林嘉華：講良心多過信心
一班港視藝員今日亦會重返政總撐場。港視藝人林嘉華昨表示：「我應該會喺黃昏時分到政總，我會講良心多過信心，我相信真係有良心嘅人，係唔會揞住佢哋嘅良心。」對於政府昨午忽公開「六頁紙」，似欲轉移視線，他說：「呢件事唔係三、兩日發生嘅事，到今日突然講呢番說話，我就覺得『三個字』：於理不合。」
另一港視藝員艾威指：「我覺得今次算係最後努力，畀壓力啲議員，投票贊成用特權法逼政府交代真相。」他對政府會公開不發牌原因的信心接近零，「但係即使只有萬分之零點一既機會，表達訴求仍要持續」。
連日來到街站爭取市民簽名的麥子樂，亦對政府的做法有異議：「佢哋根本係一個大話冚一個大話，佢哋不嬲都係呢個做法！」港版「半澤」陸駿光亦直言會繼續撐到底，他覺得政府的說法無異是自打嘴巴。岑潔儀稱收工後會趕到政總支持，「我哋會一路堅持，唔會畀呢件事停落嚟，呢次唔單止係我哋嘅堅持，仲係香港人嘅一個堅持」。關寶慧亦表示：「𠵱家惟有可以做既，就係繼續爭取。」
但據稱今日亦會有建制派團體動員20多個組織逾千人到場反對港視、支持政府的團體，誓與港視員工打對台。昨晚所見，立會外已掛有支持政府做法的橫額。
留守10壯士感言
蔡錦源
「從來冇任何期望，你知制度係咁樣，你知建制派議員係咁樣。我期望喺市民身上，有30萬人包圍立法會，我唔相信立法會議員夠膽否決佢。」
阿Jill
「我唔係好樂觀但有希望，但有啲市民講唔發牌畀你係啱嘅。公義！冇公義好耐喎！我就向下一個進發，希望將件事同身邊嘅人講！」
Ken
「最難忘有朝食早餐，有位出家人滿頭大汗走過嚟，同我哋講雖然我係出家人唔睇電視，但我知道呢件事係好唔公平唔公義！」
陳仲明
「我哋通過堅持影響市民睇法，一傳十、十傳百最終產生力量，長遠可以制衡政府，今件事件令市民知道政府已經不受民意制約。」
鄺皓揚
「留守喺政總會感覺到公民醒覺，佢哋幾忙都會嚟支持，有啲人原本撐梁振英，見到佢政策越嚟越拖，講嘢唔啱就變咗支持我哋。」
阿敏
「我知（通過特權法）機會唔大，但好想盡力去做，冇話付出咗會有好結果，但係唔付出一定冇，好想聽日好多好多人嚟，話畀政府知香港人要啲乜！」
Joe
「政府雖然攞六頁紙出嚟，仍然未解答到我哋同公眾疑問。點解咁多市民聲音表達咗要政府公開理據，但每一次每一次政府回應都畀唔到答案。」
張可兒
「如果今次政府可以咁過骨，日後有其他事發生，香港人係咪每次都要示威遊行瞓政總先可以畀少少壓力政府，而政府又一意孤行，呢個循環要去到幾時？」
蜜瓜
「呢段時間每日好多市民嚟講加油、撐落去！我哋留喺度除咗為自己，其實為香港做嘢，留喺度可以係每個香港市民，呢件事唔係我哋10個人嘅事！」
阿芝
「議員決定點投票，最終後果要自己承擔返。我以前投過民建聯，當時太年少無知，唔知道一個議員身在高位可以咁無恥！」
足本收睇《亂噏24》x鄭中基谷德昭；跟住有新紥師妹楊千嬅駕到！
周一至周五《亂噏24》約定你： http://bit.ly/appletalk24