四條一，代表乜？咪就係11月11日嘅單身節囉。一眾單身貴族，可能會喺呢日熱烈慶祝，單拖自由行都唔錯吖，話唔定仲會有艷遇㖭！有調查發現，若果有得揀艷遇對象，港男至愛卡娃依呢嘅㗎妹，港女就至like浪漫不羈嘅法國佬。
網上旅遊公司Expedia.com.hk上月訪問咗約300個男女，結果有81%受訪者話試過一個人去旅行；身在異國時，74%受訪者幻想有艷遇或者一夜情，但想像同現實永遠有落差嘅，事關只得30%受訪者話真係試過囉！
至於艷遇對象，男女喜好大不同。港男鍾情「同聲同氣」，頭三位都係亞洲女性，日本妹大熱以33%勝出，溫柔嬌嗲嘅台灣女仔以18%排第二，排第三嘅竟然係強國女，有14%受訪者撐。
港女口味就比較洋化嘞，浪漫見稱嘅法國佬最獲歡心，以20%排頭位，亞洲區內比較體貼嘅台灣男生呢，就以14%排第二位，爭住操到好似阿Rain咁大隻嘅韓國男生就排第三，獲12%支持。奇就奇在，最多艷遇發生嘅地方，竟然係強國？！
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange